हुप्सेकोटमा कांग्रेस र एमाले कार्यकर्ताबीच झडप : उम्मेदवारसहित कार्यकर्ता घाइते, गाडी तोडफोड

बुटवल- पूर्वी नवलपरासीको हुप्सेकोट गाउँपालिकाकामा कांग्रेस र एमालेका कार्यकर्ताहरूबीच झडप भएको छ । अवसरमा कांग्रेसका अध्यक्ष र उपाध्यक्षका उमेदवार चढेको गाडीमाथि एमालेका कार्यकर्ताले तोडफोड गरेका छन् ।

त्यसक्रममा अध्यक्षका उमेदवार लक्ष्मी पाण्डे र उपाध्यक्षका उमेदवार पूर्णसिंह राना पनि घाइते भएको जिल्ला प्रहरी कार्यालयका नवलपुरका सूचना अधिकारी सन्तोष पाठकले बताए । घाइतेलाई उपचारका लागि चितवन पठाइएको छ ।

---

हुप्सेकोटको वडा नं. ३ बाट चुनाव प्रचारप्रसार गरेर घर फर्कने क्रममा कांग्रेस र एमालेका कार्यकर्ताहरू जम्काभेट भएका थिए । त्यस क्रममा भनाभन हुँदा दुवै पक्षबीच झडप भएको प्रहरीले जनाएको छ । झडप भएपछि उम्मेदवारको गाडीमाथि एमालेका कार्यकर्ताले तोडफोड गरेको नायब उपरीक्षक पाठकले बताए । झपडमा एमालेका ३ कार्यकर्ता पनि घाइते भएको प्रहरीले जनाएको छ । उनीहरूको मध्यविन्दु अस्पतालमा उपचार भइरहेको छ ।