कर्णालीकै लामो तथा ठूलो जात्राको तयारी पूरा

जुम्ला- कर्णालीकै लामो तथा ठूलो जात्राको तयारी पूरा भएको छ ।  १९ सय ५५ मा नेवार समुदायको सुरु गरेको यो जात्राको यस वर्षको तयारी पूरा भएको हो । 

नेवार समुदायका प्रमुख पर्वको रुपमा रहेको जात्रा जुम्लामा बसोबास गर्ने नेवार समुदायका कृष्णमान श्रेष्ठ र पूर्णमान श्रेष्ठले सुरु गरिएको यो जात्रा अहिले जुम्लाबासीको महत्त्वको रुपमा रहेको छ । 

---

नेवार समुदायको प्रमुख पर्व भए पनि पछिल्लो समय जात्राप्रतिको मोह अन्य समुदायका जुम्लीहरुमा बढ्दै गएको जात्रा समितिका कोषाध्यक्ष महेन्द्र कार्कीले बताए । जात्रा साउन १० गतेबाट विधिवत रुपमा सुरु गरिने भएको छ । 

नेवार समुदायले मनाउने जात्रामा पछिल्लो समय ब्राह्मण, क्षेत्री, बौद्ध धर्मावलम्बी र दलित समुदायको पनि सहभागिता हुन थालेको छ । समग्र कर्णालीको ऐतिहासिकता झल्काउने अवसरको रुपमा जात्रालाई  व्यवस्थित रुपमा सञ्चालन गर्नका लागि सबैको साथ सहयोग आवश्यक रहेको उनीहरुको भनाइ छ । 

जात्राको लागी पहिलो उठाइले  शुल्क यस पटक स्वेच्छिक बनाइएको छ । यसको लागि आर्थिक समितिमा उत्तम श्रेष्ठ रहेको जात्रा समितिका अध्यक्ष रमेश श्रेष्ठले बताए । संरक्षण समितिका अध्यक्ष चित्रलाल श्रेष्ठ रहेका छन् । जुम्लाको जात्रा सफल पार्नका लागी २९ जनाको समिति बनाइएको छ । बाजा समितिका संयोजक हरि परियारलाई राखिएको छ ।   

जात्रामा झण्डै  सात लाख खर्च लाग्ने अनुमान गरिएको छ । यसको लागी जुम्लाका सबै स्थानीयतहमा आवश्यक पहल भइरहेको कोषाध्यक्ष कार्कीले बताए । 
कर्णालीमा मनाइने गाईजात्राको ऐतिहासिक महत्व छ । वर्षको एक पटक आउने जुम्लाको जात्रा हेर्न बाहिर जिल्लाबाट समेत सर्वसाधारणको सहभागी हुने गरेको छ । 

जात्रामा देखाइने प्रस्तुतिले साना बालबालिकादेखि सबैको मन तान्न सफल भएको पाइन्छ । गाईजात्रा,  रोपाई जात्रा , पल्टन जात्रा ,मिम वास्सा, फौजी व्यारेक, साधु सन्त, खस धामी झाँक्री लगायतका विभिन्न प्रकारका नाचहरु हास्य-व्यङ्ग्यका प्रस्तुत देखाइने गरिन्छ  ।