सुर्खेत- डिभिजन वन कार्यालय सुर्खेतको हिरासतमा मृत्यु भएका व्यक्तिका परिवारले तीन दिनपछि शव बुझेका छन् । वन सम्बन्धी मुद्दामा पक्राउ परेका  वीरेन्द्रनगर १३ का ५८ वर्षीय धनीराम लामिछानेको हिरासतभित्र मृत्यु भएको थियो । मृतकका परिवारले कर्मचारीको कुटाइबाट लामिछानेको मृत्यु भएको भन्दै घटनाको सत्यतथ्य छानबिन गर्न माग गर्दै शव बुझ्‍न मानेका थिएनन् ।

घटनापछि छानबिन समिति गठन भएको थियो । पीडित परिवारसँग छलफलपछि मृतक परिवारले आज शव उठाएका छन् । कर्णाली प्रदेशको उद्योग, पर्यटन, वन तथा वातावरण मन्त्रालय र परिवारबीच भएको वार्तापछि पीडित परिवारलाई रोजगारी दिने सहमति भएको छ ।

---

एकाघरका आश्रित परिवारमध्ये दुई जनालाई एक महिनाभित्र रोजगारी दिने सहमति भएको छ । डिभिजन वन कार्यालयका अनुसार लामिछानेका आश्रित दुई जनालाई उद्योग, पर्यटन, वन तथा वातावरण मन्त्रालय वा मातहतका निकायमा रोजगारी उपलब्ध गराउने सहमति भएको हो । एक महिनाभित्र उनीहरूलाई रोजगारीमा लगाउने सहमति भएको छ ।

यस्तै परिवारले माग गरेको २५ लाख रुपैयाँ क्षतिपूर्ति उपलब्ध गराउन मन्त्रालयले कर्णाली प्रदेशको मन्त्रिपरिषदमा प्रस्ताव लिने भएको छ । लामिछानेका एक जना छोरालाई उच्च शिक्षा छात्रवृत्ति दिने सहमति पनि भएको कार्यालयले जनाएको छ । सहमतिपछि शव पोष्टमार्टम गरी आज दाहसंस्कार गरिएको मृतक परिवारका छिमेकी कुलबहादुर खानले बताए ।

डिभिजन वन कार्यालय वीरेन्द्रनगर हिरासतमा आरोपितको मृत्यु भएको विषयमा छानबिन गर्न शुक्रबार समिति पनि गठन गरिएको थियो । मुख्यमन्त्री तथा मन्त्रिपरिषदको कार्यालयका सचिवको संयोजकत्वमा बनेको समितिमा जिल्ला प्रशासन कार्यालय सुर्खेतका एक जना अधिकृत, राष्ट्रिय अनुसन्धान कार्यालय सुर्खेतका एक जना अधिकृत, जिल्ला प्रहरी कार्यालय सुर्खेतबाट प्रहरी निरीक्षक र उद्योग, पर्यटन, वन तथा वातावरण मन्त्रालयका कानुन सचिव सदस्य रहेका थिए ।

समितिले सात दिनभित्र प्रतिवेदन बुझाउनुपर्ने छ । बिहीबार बेलुका वन सम्बन्धी मुद्दामा पक्राउ गरिएका व्यक्तिको कार्यालयको हिरासतमा मृत्यु भएको पाइएपछि परिवार तथा आफन्तले पहिलो दिन कार्यालयमै पुगेर आन्दोलन गरेका थिए ।

बिहीबार डिभिजन वन कार्यालय सुर्खेतमार्फत पक्राउ गरिएका वीरेन्द्रनगर-१३ भूतचोकका ५८ वर्षीय लामिछानेको कार्यालयमा पुर्‍याउने बित्तिकै मृत्यु भएको थियो । आफन्तले पक्राउ गर्नेहरूबाट कुटपिट भएपछि लामिछानेको मृत्यु भएको आरोप लगाएका छन् । शुक्रबार जिल्ला प्रहरी कार्यालय सुर्खेतमा वन कार्यालयका चार जनाविरुद्ध किटानी जाहेरी पनि आफन्तले दिएका छन् ।

डिभिजन वन कार्यालय सुर्खेतका सहायक वन अधिकृत कृष्णराम धिताल, फरेस्टर सन्तोष खत्री, वन रक्षकहरू पिउसराज तिवारी र सुरेन्द्र रानाविरुद्ध किटानी जाहेरी परेको हो । उनीहरू सबैलाई प्रहरीले नियन्त्रणमा लिएको छ ।

मदन भण्डारी राजमार्गमा पर्ने सुर्खेतको जंगलमा नम्बरिङ गरिएको रुख काटेको आरोपमा लामिछानेलाई पक्राउ गरिएको थियो । कार्यालयको हिरासतमा लामिछाने झुण्डिएको अवस्थामा फेला परेका थिए ।