कर्णालीका दुई मन्त्रीले दिए राजीनामा

सुर्खेत- कर्णालीका दुई जना मन्त्रीले आइतबार राजीनामा दिएका छन् । कर्णाली सरकारका आर्थिक मामिला तथा योजना मन्त्री विन्दमान विष्ट र जलस्रोत तथा उर्जा विकास मन्त्री गणेशप्रसाद सिंहले राजीनामा दिएका हुन् ।

कर्णालीमा माओवादी केन्द्रले आफ्ना मन्त्री हुन बाँकी रहेका दुई जना सांसदलाई पालो पुर्‍याउन मन्त्री विष्ट र सिंहलाई राजीनामा दिन लगाएको हो ।

---

शुक्रबार बसेको माओवादी केन्द्र संसदीय दलको बैठकले मुख्यमन्त्री जीवनबहादुर शाही समक्ष मन्त्री विष्ट र सिंहलाई फिर्ता बोलाउन गरेको निर्णय पठाईसकेको थियो । उक्त निर्णयअनुसार नै दुई मन्त्रीले राजीनामा दिएका हुन् ।

मन्त्री विष्ट र सिंहको ठाउँमा माओवादी दलकी सचेतक कृष्णा शाह र सांसद रातो कामीलाई सिफारिस गरेको छ । शाह जाजरकोटबाट समानुपातिक र कामी रुकुमपश्चिमबाट प्रत्यक्ष निर्वाचित प्रदेश सभा सदस्य हुन् । उनीहरूलाई मुख्यमन्त्री शाहीले आज नै मन्त्रीमा नियुक्त गर्ने तयारी रहेको छ ।