बैंकको चर्काे ब्याजविरुद्ध सुर्खेतका व्यवसायीहरू आन्दोलित

सुर्खेत- बैंकहरूको चर्काे ब्याजका कारण मर्कामा परेको भन्दै सुर्खेतको वीरेन्द्रनगरका व्यवसायीहरू आन्दोलित भएका छन् ।

चर्काे ब्याजविरुद्ध व्यवसायीहरूले बजार बन्द गर्नुको साथै र्‍याली समेत निकालेका छन् । शुक्रबार दिउँसो व्यवसायीहरूले स्थानीय मंगलगढी चौकबाट विरोध र्‍याली गर्दै जिल्ला प्रशासन कार्यालय र नेपाल राष्ट्र बैंक सुर्खेतमा ज्ञापन पत्र बुझाएका छन् ।

---

भूकम्प, कोरोना महामारीबाट खस्किँदै गएको व्यापार अहिले बैंकको चर्काे ब्याजका कारण व्यवसायीहरू पलायन हुने अवस्थामा रहेका उनीहरूको गुनासो छ । पछिल्लो समय कर्जाको ब्याजदर दोब्बर पुगेका कारण व्यवसायीहरू समस्यामा परेकाे सुर्खेत उद्योग वाणिज्य संघका सदस्य सचिव भद्र भण्डारीले बताए । 

पछिल्लो समय चुलिँदै गएको आर्थिक संकटका बीच जसोतसो मुलुकको अर्थतन्त्र धानिरहेको निजी क्षेत्रलाई धरासायी बनाउँदै आएका बैंकहरूले सिन्डिकेट लगाएको भण्डारीकाे आराेप छ । साेका विरुद्ध संयुक्त संघर्ष समिति गठन गरेर ज्ञापनपत्र बुझाएको उनले जानकारी दिए ।