निर्वाचनमा होमिए काँग्रेस उपसभापति, भोट माग्न गृह जिल्ला सुर्खेतमा

सुर्खेत- नेपाली काँग्रेसका उपसभापति पूर्णबहादुर खड्का आज सुर्खेत आइपुगेका छन् । मंसिर चार गते हुने चुनावमा भोट माग्नका लागि खड्का गृह जिल्ला सुर्खेत आइपुगेका हुन् । खड्का सुर्खेत क्षेत्र नं १ का प्रतिनिधि सभाका उम्मेदवार हुन् ।

२०४८ सालयता हरेक निर्वाचनमा विजयी हासिल गरेका खड्काले २०७४ मा भएको निर्वाचनमा गठबन्धनको असरका कारण झिनो मतले पराजय भोगेका थिए । यसपालि भने खड्कालाई गठबन्धनको साथ रहेको छ । चुनावी अभियानका लागि आज काठमाडौँदेखि सुर्खेत आइपुगेका खड्काले क्षेत्र नम्वर १ का नागरिकहरूसँग भेटघाटमा व्यस्त रहेका छन् । गुर्भाकोट नगरपालिकास्थित सिटी हलमा आजै आयोजित कार्यक्रमलाई उनले सम्बोधन समेत गरे ।

---

उनले नागरिकका लोकतान्त्रिक अधिकारहरूलाई स्थापित गर्न र अधिनायकवादी प्रवृत्तिका विरुद्ध संघर्ष गर्नका लागि पुनः एकपटक मुलुकको परिवर्तनकारी शक्तिलाई नेतृत्वदायी भूमिकामा पुर्‍याउन समेत मतदाताहरूसँग अपिल गरेका छन् ।

खड्काले प्रदेश र केन्द्र सरकार वाम लोकतान्त्रिक गठबन्धनको बनेपछि मात्रै कर्णालीको प्रचुर सम्भावनाहरूलाई अवसरमा बदल्न सकिने बताए । सुर्खेत विमानस्थलमा पत्रकारहरूसँग कुरा गर्दै उनले जिल्लामा आफूहरूले सुरु गरेका विकास निर्माणका काम पूरा गर्न र कृषि रोजगार, शिक्षा स्वास्थ्यमा सबै नागरिकको पहुँच पुर्‍याउने काममा आफ्नो ध्यान केन्द्रित हुने बताए ।

‘कर्णालीबाट राष्ट्रिय राजनीतिमा सधैँ मैले समन्वयकारी भूमिका निर्वाह गरेको छु । अब देशको भ्रष्टाचार अन्त्य र सुशासन कायम गर्न समन्वयकारीसँगै हस्तक्षेपकारी भूमिका मेरो रहन्छ,’ खड्का भन्छन्, ‘सुर्खेतसहित कर्णालीका हरेक समस्याको समाधानका लागि मेरो भूमिका रहँदै आएको छ र रहनेछ ।’

उनले आफूलाई समृद्ध र सुशासनयुक्त समाज निर्माण गर्ने अभियानमा लागेको औँल्याए । खड्काले स्थिरताका पक्षमा सडकदेखि सदनसम्म आवाज बुलन्द गर्ने र भ्रष्टाचारमुक्त, सुशासनयुक्त देश निर्माणका लागि सत्ता गठबन्धन बनेको बताए ।

फरक प्रशंगमा उनले सुर्खेत विमानस्थल विस्तारका सन्दर्भमा केही प्राविधिक समस्या रहेको भन्दै प्रभावित क्षेत्रका नागरिकको समस्यालाई पनि बुझ्नुपर्ने बताए । उनले विमानस्थल विस्तारका लागि अन्य वैकल्पिक ठाउँहरूको पनि खोजी भएको जिकिर गरे । विमानस्थल विस्तारको विषयलाई लिएर राजनीति नगर्न पनि उनले सबैलाई आग्रह गरे ।