क्याफ्स कर्णाली परियोजना हस्तान्तरण

जुम्ला- जुम्लामा सञ्चालित (क्याफ्स कर्णाली) परियोजना स्थानीय तहलाई हस्तान्तरण गरिएको छ । नेपालको कर्णाली क्षेत्रको खाद्य उत्पादन तथा खाद्य सुरक्षामा जलवायु परिवर्तनद्वारा सिर्जित चुनौती अनुकूलन सम्बन्धी कार्यक्रम (क्याफ्स कर्णाली) परियोजना कार्यअवधि सकिएपछि सम्बन्धी स्थानीय तहमा हस्तान्तरण गरिएको हो ।

अनुकूलन कोषको आर्थिक सहयोगमा नेपाल सरकार वन तथा वातावरण मन्त्रालय र विश्व खाद्य कार्यक्रमको साझेदारीमा पेस नेपाल जुम्लाले निर्माण भएका आयोजना सकिएको छ  । 

---

२६ करोड ६९ लाख ७६ हजार ३ सय १८ रुपैयाँ ४८ पैसामा निर्माण भएका आयोजना स्थानीय तह हिमा, तिला र तातोपानी गाउँपालिकालाई हस्तान्तरण गरेको छ । 
जीविकोपार्जनका साधन तथा प्राकृतिक स्रोतको सुदृढ व्यवस्थापनमार्फत उच्च पहाडी हिमाली जिल्लाका जलवायु संकटासन्न, खाद्य असुरक्षित र गरिब घरपरिवारको अनुकूलन क्षमता अभिवृद्धि गर्ने लक्ष्यका साथ परियोजना सञ्चालन गरिएको  पेस नेपालका कार्यकारी अध्यक्ष किशोर न्यौपानेले बताए ।

उनका अनुसार नेपालको कर्णाली क्षेत्रको खाद्य उत्पादन तथा खाद्य सुरक्षामा जलवायु परिवर्तनद्वारा सिर्जित चुनौती अनुकूलन सम्बन्धी कार्यक्रम (क्याफ्स कर्णाली) सन् २०१८ अक्टोबरदेखि सञ्चालन गरिएको थियो । परियोजना अवधि ४ वर्षको हो । उनले भने, 'अक्टुबर २०२२ मा ४ वर्षे परियोजना सम्पन्न भए पनि निर्माण भएका सबै आयोजना स्थानीय तहलाई हस्तान्तरण गरिएको हो ।'

१३८ हेक्टर जमिन सिँचाइ हुने नहर (कुलो) निर्माण, ४ वटा सामुदायिक सेवा केन्द्र भवन निर्माण, ४१ हेक्टरमा १४ हजार १२५ विरुवाको व्यावसायिक फलफूल खेती र ८ हेक्टर गैरकाष्ठ वनपैदावार खेती भएको छ । यस्तै ३८३ जना कृषकको बाली तथा पशु बीमाका लागि सहयोग, एक वटा लिफ्ट सिँचाइबाट ३२ हेक्टर जमिन सिँचाइ भएको पेस नेपाल जुम्लाले जनाएको छ । 

९ वटा सुधारिएको पानी घट्ट निर्माण भएका छन् । ४० हेक्टर जमिन सिँचाइ हुने ७ वटा पानी संकलन पोखरी निर्माण, १ वटा लघुजलविद्युत् आयोजना निर्माण, ५ वटा रष्टिक स्टोर तथा संकलन केन्द्र भवन निर्माण गरिएको छ ।

४७८ घरधुरीका लागि ४ वटा खाने पानी आयोजना निर्माण, ८ वटा कृषि तथा वन नर्सरी स्थापना भएका छन् । घरबगैँचा स्थापनाका लागि १ हजार ७२२ घरधुरीलाई ५२ हजार ५७१ फलफूलको विरुवा सहयोग गरिएको जनाएको छ ।

४ वर्षे परियोजना बाट १७ हजार ५१६ लाभान्वित जनसंख्या रहेको छ । १२ हजार ७ सय जनालाई जलवायु परिवर्तन अनुकूलन सम्बन्धी सचेतीकरण गरिएको विश्व खाद्य कार्यक्रमका फिल्ड संयोजन कृष्ण शाहीले बताए । ३ हजार ७३८ कृषकलाई प्राविधिक सहयोग भएको छ । उनले भने, '४८ वटा सामुदायिक पूर्वाधार निर्माण गर्दा ज्यालाका रूपमा ८ करोड १० लाख ४६ हजार ४८१ रुपैयाँ नगद हस्तान्तरण गरिएको छ ।'

कार्यक्षेत्रमा पर्ने गाउँपालिकामा ३ वटा स्थानीय अनुकूलन कार्ययोजना निर्माण गरिएको छ ।

परियोजनाको कार्यक्षेत्र तातोपानी, तिला र हिमा गरी ३ वटा गाउँपालिकाका १० वडाका ३ हजार ५२६ घरधुरीका २१ हजार १५० जनसंंख्या रहेको पेस नेपाल जुम्लाले जनाएको छ । न्युज कारखना