भेरी करिडोर सडकलाई प्राथमिकतामा राखेर बजेट विनियोजन गर्छाैं : मन्त्री खड्का

सुर्खेत- उपप्रधान तथा रक्षा मन्त्री पूर्णबहादुर खड्काले कर्णाली करिडोरको सडकलाई प्राथमिकतामा राखेर बजेट विनियोजन गर्ने बताएका छन् ।

सुर्खेत विमानस्थलमा पत्रारहरूसँग कुरा गर्दै खड्काले कर्णाली करिडोरलाई प्राथमिकतामा राख्ने बताएका हुन् । ‘अहिले मुलुकको अर्थतन्त्रको अवस्था अप्ठेरो छ त्यसका बावजुत पनि कर्णाली करिडोरको सडकलाई राष्ट्रिय प्राथमिकताको राखेर बहुवर्षीय योजनामा अगाडि बढाउने योजनामा छौं,’ खड्काले भने, ‘कर्णाली करिडोरका लागि बजेट निर्माणको प्रक्रियामा छौं ।’

---

यसका लागि कर्णालीबाट संघमा प्रतिनिधित्व गर्ने सबै मन्त्रीहरूले यसलाई प्राथमिकताका साथ अगाडि बढाउने खड्काकाे भनाइ छ । रत्नराजमार्गको सडकको डिपिआर भएको र त्यसलाई अगाडि बढाउने काम भएको उनले बताए । त्यसैगरी वीरेन्द्रनगर तेलपानी भुरीगाउँ सडकलाई पनि प्राथमिकतामा राखेको उनले बताए ।

उनका अनुसार कर्णाली र सुदूरपश्चिमलाई संघीय बजेटबाट धेरै पछाडि पार्ने चलन भएको भन्दै अब यी प्रदेशमा बजेटको प्राथमिकतामा पारिने छ । ‘सम्माननीय प्रधानमन्त्री र म चुनावी अभियानका क्रममा कर्णाली आउँदा हामीले चुनाव जित्यौ भने त्यसपछि बन्ने सरकारले बजेटमा प्राथमिकता पार्छाैं भनेका थियौं,’ मन्त्री खड्काले भने, ‘यस कुरामा हामी प्रतिबद्ध छौं । विगतमा यो प्रदेश पछाडि परेको अवस्था हो त्यसलाई चिर्दै अगाडि बढ्दै छौं ।’

रक्षामन्त्री खड्काले उपचुनावपछि संघीय सरकारले पूर्णता पाउने र सरकारका बाँकी रहेका उपचुनावपछि बाँकी कामहरू पनि हुने बताए । अहिले यो बीचमा काम गर्नका लागि संसद् बैठक १२ गतेका लागि तोकिएको खड्काकाे भनाइ छ ।

‘यो बीचमा सर्वाैच्च अदालतको प्रधानन्यायाधीशको नियुक्ति, सुनुवाइ समितिको निर्माण, त्यसैगरी संवैधानिक परिषद्सँग जोडिएको ऐन पेश भइसकेको छ त्यसलाई पनि अघि बढाउने गरी प्रक्रिया अघि बढेको छ,’ उनले भने, ‘अस्ति मात्रै संवैधानिक परिषद्को बैठक बस्यो हामी सबै सदस्यहरू सहभागी भयौं । त्यहाँ प्रधानन्यायाधीशको नियुक्तिका विषयमा छलफल भयो र केही इस्यूका विषयमा पनि छलफल भयो, त्यो निर्णय आउन बाँकी छ ।’