एमाले कर्णाली अधिवेशन : न सर्वसम्मत न उम्मेदवारी घोषणा

सुर्खेत- नेकपा एमालेको अधिवेशन जारी छ । तर, अहिलेसम्म नेतृत्वका लागि न कसैले उम्मेदवारी घोषणा नै गर्न सकिरहेका छन् न सर्वसम्मतको प्रयास नै सफल बनेको छ । अहिलेसम्म अन्योल नै देखिएको छ ।

पार्टीका अध्यक्ष केपी शर्मा ओलीले सकेसम्म सर्वसम्मत तरिकाले अधिवेशन सम्पन्न गर्न निर्देशन दिएर फर्किएका थिए । ओलीले भनेका थिए, ‘सकेसम्म सर्वसम्मत गर्नुहोस्, यसले एकताको सन्देश जान्छ, नभए चुनाव लड्नुहोस्, हार्नुहोस्, जित्नुहोस् तर, प्यानल बनाएर चुनाव लड्न पाइँदैन ।’ 

---

बिहीबार दिनभर पनि महासचिव शङ्कर पोखरेलले सहमतिको प्रयास गरे । तर, कुनै पनि हालतमा सर्वसम्मत तरिकाले नेतृत्व चयन हुने नदेखेपछि उनी बन्दसत्रमा सहभागी नै नभएर काठमाडौँ फर्किए । नौ घण्टापछि मात्रै बन्दसत्र सुरु भयो । 

सर्वसम्मत तरिकाले नेतृत्व चयन हुने सम्भावना भने नरहेको एमाले प्रदेश अध्यक्ष विनोदकुमार शाहले जानकारी दिए । ‘हामी सर्वसम्मतकै प्रयासमा रहेका छौ’ शाहले भने, ‘नेतृत्वमा चार जनाकै आकांक्षा देखाएपछि सर्वसम्मत गर्न सकिएको छैन । जसमा दुई जनाले आफ्नो दावी नै छोड्नुभएको छैन ।’

नेताहरूका अनुसार सर्वसम्मत तरिकाले नेतृत्व चयन गरे सल्यानका गुलावजंग शाह अध्यक्ष चुनिने छन् । तर, सर्वसम्मत तरिकाले नभएको खण्डमा चुनावी प्रतिस्पर्धा हुन्छ । त्यसैगरी केन्द्रको जोड भने मीनबहादुर शाहीलाई रहेको उनीहरूको भनाइ छ । शाह केन्द्रमा शङ्कर पोखरेलका विश्वासिला पात्रका रूपमा चिनिन्छन् भने प्रदेशमा यामलाल कँडेलको टिमका व्यक्ति हुन् । स्रोतका अनुसार शङ्कर पोखरेलको जोड शाहलाई नै देखिन्छ ।

तर, गोरख बोगटी–विनोदकुमार शाहको टिमबाट मीनबहादुर शाही पछि पर्न चाहन्नन् । यदि चुनाव भएको खण्डमा शाहीले सबैतिरको भोट तान्न सक्ने–नसक्नेमा उनको टिमभित्र नै आशंका गरिएको छ ।

चुनावी प्रतिस्पर्धा भएमा अध्यक्षका आकांक्षी पूर्व सभामुख राजबहादुर शाहीले नै भोट बढी तान्न सक्ने सम्भावना बढी रहेको एमाले नेताहरू बताउँछन् ।