हुड्के-क्युरेनी सडक शिलान्यास

सुर्खेत- पश्चिम सुर्खेतको हुड्केदेखि क्युरेनी सडक कालोपत्रेका लागि शिलान्यास गरिएको छ । सुर्खेतको बराहताल गाँउपालीका वडा न ४ स्थित हुड्के क्युरेनी सडक कालोपत्रेका लागि सडक शिलान्यास गरिएको हो  ।

आज कर्णाली प्रदेशसभा सदस्य विन्दमान विष्टले १७ किलोमिटर सडकको शिलान्यास गरेका छन् । खड्का कन्स्ट्रक्सनले ६१ करोड लागतमा आगामी २०८३ असार १५ भित्र उक्त सडक निर्माणको काम सम्पन्न गर्ने सम्झौता अनुसार कालोपत्रेको कामको सुरुवात गरिएको छ  । उक्त सडक कालोपत्रे भएपछि हुड्केदेखि क्युरेनी, साझघाट,  चेपाङ, ईखेनी, बुटी लगायत ठाउँमा सडक यातायात सहज रूपमा सञ्चालन हुने छ ।

---

उक्त सडक बराहताल गाउँपालिका वडा न ३,४,५, ६ र ८ का साथै पञ्चपुरी नगरपालिकाको जामु तातापानीसम्म जोडिने छ । सामान्य रूपमा यातायातका साधन सञ्चालन हुँदै आएको उक्त क्षेत्रमा सडक पिच भएपछि बाह्रै महिना यातायात सुविधा उपलब्ध हुनेछ । अन्य समयमा यातायात सञ्चालन भएता पनि बर्खायाममा भने सवारी आवागमन रोकिँदा यस क्षेत्रका नागरिकहरूले सास्ती खेप्दै आइरहेका छन् ।