राउटेले अब मासिक पाँच हजार भत्ता पाउने

सुर्खेत : कर्णाली प्रदेश सरकारले फिरन्ते जीवन बिताउँदै आएका राउटे समुदायलाई मासिक दुई हजार भत्ता दिने निर्णय गरेको छ । प्रदेश सरकारको मन्त्रिपरिषद् बैठकले लोपोन्मुख अवस्थामा पुगेको राउटे समुदायको संरक्षण गर्न थप दुई हजार भत्ता दिने निर्णय गरेको हो ।

योसँगै राउटे समूदायले मासिक पाँच हजार भत्ता पाउने छन् । यस अघि गुराँस गाउँपालिकाले सामाजिक सुरक्षाभत्ता वापत तीन हजार रुपैयाँ प्रदान गर्दै आएको थियो । प्रदेश सरकारले थप दुई हजार दिने निर्णय गरेपछि राउटेले पाँच हजार मासिक भत्ता पाउनेछन् ।

---

राउटेलाई थप दिइने भत्ता रकम आर्थिक मामिला तथा योजना मन्त्रालयबाट गुराँस गाउँपालिकालाई हस्तान्तरण गरिनेछ । गाउँपालिकालाई हस्तान्तरण भएपछि राउटेलाई एकमुष्ट रकम उपलव्ध गराइने गुराँस गाउँपालिकाका अध्यक्ष खेमराज वलीले जानकारी दिए । सुर्खेतको चिंगाड गाउँपालिका-५ को ढाँडखेत सुर्खेतमा बस्ती सरेका राउटे समुदायका ४६ घरधुरीका एक सय ५१ जना छन् ।

सोमबार बसेको मन्त्रिपरिषद् बैठकले खाद्यान्न तर्फको खर्च शिर्षकबाट विनियोजित भएको १५ करोड र कोभिड शिक्षातर्फको खर्च शिर्षकबाट बिनियोजित १० करोड रकम क्रमागत आयोजनाहरूमा खर्च गर्ने निर्णय गरेको छ । 

त्यसैगरी सहकारीमार्फत ब्याज अनुदान कार्यविधि २०७७ स्वीकृति गर्ने निर्णय भएको कर्णाली सरकारका प्रवक्ता विमला केसीले जानकारी दिइन् । बैठकमा शान्ति तथा पुर्नस्थापना केन्द्र स्थापना गर्न बनेको विधेयक कर्णाली प्रदेश सचिवालयमा दर्ता गर्न स्वीकृति प्रदान गर्ने निर्णय भएको छ । त्यसैगरी मुख्यमन्त्री जिविकोपार्जन कार्यक्रम सञ्चालन कार्यविधि २०७७ स्वीकृत गर्ने निर्णय भएको छ ।