आयात मात्रै हाेइन अब कर्णालीले निर्यातमा जोड दिन्छ- मुख्यमन्त्री शाही

सुर्खेत-कर्णाली प्रदेशका मुख्यमन्त्री जीवनबहादुर शाहीले आयातमा मात्र नभई निर्यातमा पनि जोड दिन आग्रह गरेका छन् । युवा उद्यमी तथा व्यवसायी संघ कर्णाली प्रदेशले आयोजना गरेको कार्यक्रममा मुख्यमन्त्री शाहीले कर्णालीमा आयात मात्र हुने गरेकोमा अब निर्यातमा जोड दिन आग्रह गरेका हुन् ।

कर्णालीमा रहेका करोडौ रुपैयाँका बहुमुल्य वस्तु (जडिबुटी) लाई यही प्रशाेधन गरेर निर्यात गर्न सकिए सबै लाभान्वित हुने उनले बताए । ‘हामीसँग बहुमुल्य जडिबुटी छन् । त्यसलाई संकलन गरेर भारततर्फ निर्यात मात्र गरेको छौं ।’ उनले भने, ‘त्यसलाई यही प्रशाेधन गरेर निर्यात गरेको भए आफै बढी फाइदा लिन सक्थ्यौं ।’

---

मुख्यमन्त्री शाहीले याे क्षेत्रमा बहुमुल्य च्याउ, झ्याउ र स्याउ रहेकाे बताए । 'तर, त्यसको व्यवस्थापन गर्न सकेका छैनौं,’ उनले भने, ‘त्यसलाई व्यवस्थित र बजारीकरण गर्न सकियो भने धनी हुन धेरै बेर कुर्नु पर्दैन् ।’ 

कर्णाली विकासका लागि ६ वटा ‘ब’ लागु गर्न सके यहाँको विकासको ढोका खुल्ने मुख्यमन्त्री शाहीले बताए । ‘बाटो, बिजुली, बजार, विचार, वन र व्यवस्थापन अति आवश्यक हो ।’ उनले भने, ‘विकट प्रदेशमा कनेक्टिभिटी राम्रो भए स्वास्थ्य, शिक्षा र रोजगारीका अवसर सृजना हुनसक्थे ।’

यस्तै कर्णालीको आर्थिक विकासका लागि औधोगिकरण आवश्यक रहेको सुर्खेत वीरेन्द्रनगर नगरपालिकाका प्रमुख देवकुमार सुवेदीले बताए । 'हामीले कर्णालीकाे विकासका लागि उद्योग नै सञ्चालन गर्न सकेका छैनौं ।’ उनले भने, ‘उद्योग धन्दामा लगानी भित्र्याउन आवश्यक रहेको छ ।’