मुख्यमन्त्री शाहीले स्टाटस लेख्दै भने- आइतबारसम्म कर्णालीमा मन्त्रिपरिषद् विस्तार हुन्छ

सुर्खेत- कर्णाली प्रदेशका मुख्यमन्त्री जीवनबहादुर शाहीले आइतबार सरकारलाई पूर्णता दिने संकेत देखाएका छन् । आज बिहान फेसबुक स्टाटसमार्फत उनले यस्तो जानकारी गराएका छन् । उनले स्टाटसमार्फत आफूलाई सोधिरहनेहरुले आइतबार जवाफ पाउने बताएका छन् । 

उनले लेखेका छन्, ‘बारम्बार बारम्बार मलाई सोधिरहने प्रश्नको जवाफ आइतबारसम्म पाउनुहुनेछ महोदयहरु ।’ मुख्यमन्त्रीमा नियुक्त भएको तीन महिनासम्ममा पनि मन्त्रिपरिषद्लाई पूर्णता दिन नसकेको भन्दै उनको आलोचना भइरहेको छ । मुख्यमन्त्री कार्यालय स्रोतका अनुसार आइतबाारसम्म मन्त्रीहरुको टुंगो लाग्ने सम्भावना देखिएको छ । 

---

आठ मन्त्रालय रहेको कर्णालीमा नेकपा माओवादीले चार मन्त्रालय, समाजवादीले तीन मन्त्रालय र काँग्रेसले मुख्यमन्त्रीसहित तीन मन्त्रालयमा दाबी नछोडेपछि भागबण्डा मिलाउन सकस भएको थियो ।

सत्ताघटक दलहरू आफ्नो दाबीबाट टसमस नभएपछि सरकार विस्तार झनै पेचिलो बन्दै गएकाे छ । यसअघिको मन्त्रिमण्डलमा माओवादीबाट आर्थिक मामिला तथा योजना मन्त्रीमा विन्दमान विष्ट र समाजवादीबाट भूमि व्यवस्था कृषि तथा सहकारी मन्त्रीमा चन्द्रबहादुर शाही नियुक्त भइसकेका छन् । माओवादी केन्द्रमा भने गैरसांसदलाई मन्त्री बनाउन नहुने भन्दै आलोचना सुरु भएको छ ।

गठबन्धनबीचमा भागबण्डा नमिल्दा सरकार विस्तारको काम अघि बढ्न नसकेको हो । नेकपा (माओवादी केन्द्र) र नेकपा (एकीकृत समाजवादी) को समर्थनमा गत कात्तिक १६ गते कांग्रेस संसदीय दलका नेता शाही मुख्यमन्त्री बनेका थिए ।