मतदाताको आरोप : नेता भोट माग्न आउँछन्, जितेपछि फर्कदैनन्

सुर्खेत – स्थानीय तह निर्वाचन नजिकिएसँगै कर्णाली प्रदेशका ७९ पालिकामा चुनावी चहलपहल बढेको छ । डाडाँपाखा अनि बजार क्षेत्र विभिन्न थरीका झण्डा र ब्यानरले झकिझकाउ छन् । कतै पञ्चेबाजा त कतै ठूला ठूला डेग र साउण्डबक्समा पार्टीका गीतहरु घन्किएका छन् । दलका उम्मेदवारहरू आफ्नो घरदैलो अभियानलाई तीव्रता दिएका छन् । उनीहरु आफ्ना घोषणापत्र र प्रचारप्रसार सामग्रीसहित घरदैलोमै भट्न जान्छन्, नमस्कार गर्छन् र भोट माग्छन् । 

प्रदेशको सबै जिल्लाहरुमा कतै गठबन्धन त कतै एक्लाएक्लै चुनावी प्रतिस्पर्धामा आएका छन् । नेपाली काँग्रस, माओवादी र समाजवादीको गठबन्धनमार्फत प्रतिस्पर्धामा छन् भने एमाले एक्लै चुनावी प्रतिस्पर्धामा रहेका छन् । सबै उम्मेदवारहरू बिहान सबेरैदेखि राति अबेरसम्म दलका झण्डा, उम्मेदवारहरूको फोटो र निर्वाचन चिन्ह बोकेर मतदाताको घरघरमा पसिरहेका हुन्छन् ।  

---

आफ्ना उम्मेदवारलाई विजयी गराउन घरदैलो अभियानलाई तीव्र बनाइएको कांग्रेस जिल्ला उपसभापति विष्णु खड्काले बताए । ‘सहरी विकासको योजना, सहरी स्वास्थ्य पूर्वाधार, भेरी लिफ्टिङलगाययतलाई प्रमुख चुनावी एजेन्डा बनाएका छौं,’ खड्काले भने, ‘गठबन्धन भएका नगर र वडामा संयुक्त रूपमा प्रचार थालिएको छ ।’ सबै टोल समितिलाई सक्रिय बनाएर उम्मेदवारसहित घरदैलो गर्ने काममा जोड दिइएको उनले जानकारी दिए ।

एमालेले जनसभा र कोणसभालगायतका कार्यक्रमलाई तीव्र बनाएको वीरेन्द्रनगर नगरपालिका प्रमुखकी उम्मेदवार मोहनमाया ढकालले बताइन्  । ढकालले घरदैलोसँगै विभिन्न चोकहरुमा कोणसभाको आयोजना गरिएको बताइन् । उनले विकास निर्माणका एजेण्डासँगै सुकुम्वासी समस्या समाधान र जेष्ठ नागरिकको हात हातमा भत्ता दिने कार्यक्रमलाई प्रमुख एजेण्डाको रुपमा लिएको बताइन् । 

‘ज्येष्ठ नागरिकलाई हात–हातमा भत्ता नै हाम्रो मुख्य एजेण्डा हो,’ ढकालले भनिन्, ‘यसअघि नगर उप्रमुख भएर कामकाज गरेकाले धेरै कुराको अनुभव छ, सुकुम्बासी समस्या समाधान र व्यवस्थित सहरीकरणलाई पनि एजेन्डामा प्राथमिकता दिएका छौं ।’

यता मतदाता भने चुनावमा मात्र ठूला ठूला सपना दखाएर भोट माग्ने अनि जितेपछि नहेर्ने गरेको बताउँछन् । ‘चुनावका बेलामा मात्र घरदैलो आउने नेताहरु अघिपछि किन आउँदैनन्’ हाल वीरेन्द्रनगरमा व्यवसाय गर्दै आएकी सल्यानकी लालसरी थापाले भनिन्, ‘भोट माग्न आउँछन्, जितेपछि फर्केर आउँदैनन् ।’

वीरेन्द्रनगरकी गीता साहीको अनुभव प िउस्तै छ नेताहरु पुरानै कुराहरु ल्याएर आउने र नागरिकको समस्या उस्ताको उस्तै छ । ‘हाम्रा सामान्य आवश्यकताहरु मात्र पूरा गरेपनि खुसी हुने थियौ’ उनी भन्छिन्, ‘वीरेन्द्रनगरको मुख्य समस्या भनेको खानेपानीको हो यो समस्या कहिल्यै पूरा हुँदैन ।’