लडेर घाइते भएका मुख्यमन्त्री शाहीलाई हेलिकोप्टरबाट सुर्खेत लगियो

सिमकोट : कर्णाली प्रदेशका मुख्यमन्त्री महेन्द्रबहादुर शाही घोडाबाट लडेर घाइते भएपछि थप उपचारका लागि सुर्खेत लगिएको छ ।  कर्णाली प्रदेश सरकारले शुरु गरेको जनतासँग मुख्यमन्त्री भन्‍ने टेलिभिजन कार्यक्रमको छायांकनका लागि सिमकोट गाउँपालिका वडा नं ३ को लिमाटाङ जाने क्रममा मुख्यमन्त्री शाही लडेर सामान्य घाइते भएका थिए । घाइते शाहीलाई हेलिकोप्टरबाट सुर्खेत लगिएको हुम्लाका प्रमुख जिल्ला अधिकारी चिरञ्जिवी गिरीले जानकारी दिए । 

सिमकोटबाट गाडीमा गएका मुख्यमन्त्री शाहीलाई आधा बाटोबाट घोडा चढाइएको थियो । उनी चढेको घोडा तर्सिदा शाही लडेर घाइते भएको घटनास्थलमा भएका नेपाल पत्रकार महासंघका जिल्ला अध्यक्ष अर्जुन बोहराले जानकारी दिए ।  (रासस)
 

---