धनगढी हाफ म्याराथनको उपाधि जुम्लाका दुर्गा बुढालाई

धनगढी : 'अब धनगढी दौडिन्छ' भन्ने मुल नाराका साथ धनगढी जेसिजले आयोजना गरेको सातौ संस्करणको धनगढी हाफ म्याराथनको उपाधि जुम्लाका दुर्गाबहादुर बुढाले जितेका छन । २१ दशमलक एक किलोमीटरको दूरी १ घण्टा ६ मिनेट ८ दशमलव १८ सेकेन्डमा पार गर्दै उनले उपाधि जितेका हुन । बुढाको यो लगातार तेस्रो उपाधी हो । उपाधीसंगै बुढाले नगद ५५ हजार ५ सय ५५ रुपैयाँ समेत प्राप्त गरे ।

यस्तै एक घन्टा ९ मिनेट ८ दशमलव ५३ सेकेण्डमा निर्धारित दूरी पार गर्दै बैतडीका नरेन्द्र रावत दोश्रो भए भने सशस्त्र प्रहरीका सन्तोष विष्ट तेस्रो भए । विष्टले एक घन्टा १२ मिनेट ४ दशमलव २७ सेकेण्डमा सो दूरी पार  गरे । दोश्रो र तेस्रो स्थान प्राप्त गर्ने रावत र विष्टले नगद ३३ हजार तीन सय ३३ र २२ हजार दुई सय २२ रुपैया समेत प्राप्त गरेका छन्।

---

यसैगरी पहिलो पटक आयोजना गरिएको खुला ५ किलोमीटर महिला तर्फको उपाधि कैलालीकी सीमा चौधरीले प्राप्त गरिन् । उपाधिसँगै चौधरीले नगद ५ हजार ५ सय ५५ रुपैयाँ प्राप्त गरिन् ।

यस्तै सीता चौधरी दोश्रो र नेहा खड्का तेश्रो भए । दोश्रो र तेश्रो हुनेले क्रमशः तीन हजार तीन सय ३३ रुपैयाँ र दुई हजार दुई सय २२ रुपैयाँ नगद प्राप्त गरे ।
धनगढी जेसिजका अध्यक्ष कमलराज पनेरुको सभापतित्वमा भएको उक्त कार्यक्रमका बिजेता खेलाडीहरुलाई सुदूरपश्चिम प्रदेशका सामाजिक विकास मन्त्री कृष्णराज सुवेदी, धनगढी उपमहानगरपालिकाकि उप-प्रमुख सुशीला मिश्र भट्टलगायतले पुरस्कार तथा प्रमाणपत्र प्रदान गरेका छन् ।