भारतबाट फर्किएका ५९ जनामा कोभिड- १९

डोटी : भारतबाट रोजगारी गरी घर फर्किएका ५९ जनामा कोभिड- १९ सङ्क्रमण पुष्टि भएको छ । प्रदेश स्वास्थ्य निर्देशनालय दिपायल राजपुरका अनुसार यहाँको गौरीफन्टा नाका हुँदै नेपाल फर्किएका कम्तीमा पनि एक हजार ४५ जनामध्ये ४७५ को एन्टिजेन परीक्षण गर्दा ५९ जनामा कोभिड सङ्क्रमण पुष्टि भएको हो । पछिल्लो समय भारतबाट रोजगारी गरी घर फर्किएका सुदूरपश्चिम प्रदेशका नागरिकमा कोभिड सङ्क्रमण बढ्ने क्रम देखिएको छ ।

कोभिड सङ्क्रमण बढ्दै गएको र यहाँका स्थानीय तहमा रहेका स्वास्थ्य संस्थाले कोभिड रोकथामका लागि खासै उल्लेख्य कदम चाल्न नसकेको भन्दै स्थानीयवासीमा त्रास उत्पन्‍न हुन थालेको दिपायल सिलगढी नगरपालिका-४ का वीरबहादुर विष्टले बताए । उनले भने, 'भारतबाट काम गरी फर्किने नागरिकमा कोभिड देखिँदै छ, रोकथामका लागि खासै पहल भएको छैन, त्रास नभए के हुनु ।'

---

जिल्लाका स्थानीय तहले भारतबाट घर फर्किएका नागरिकलाई राख्‍नका लागि क्वारेन्टिनसमेत निर्माण नगरेकाले उनीहरु सिधै आ-आफ्ना घर जान थालेको बताइएको छ । नागरिक सिधै गाउँ पस्‍न थालेका कारण यहाँका गाउँघरमा कोभिड सङ्क्रमण बढ्दै जाने तथा पछि गएर कोभिडले महामारीको रुप लिन सक्नेभन्दा यहाँका गाउँघरमा रहेका नागरिकमा त्रास उत्पन्‍न हुन थालेको हो । यहाँको स्थानीय प्रशासनले भारतबाट रोजगारी गरी घर फर्किएका नागरिकलाई अनिवार्य १५ दिन क्‍वारेन्टाइन राख्नुपर्ने निर्णय गरेको भए पनि उक्त निर्णयको पालना नहुँदा झनै समस्या भएको बताइएको छ । रासस