कर्णाली नदीले खतराको तह पार गर्‍यो, बाँध फुटेर बस्तीमा पानी

कैलाली- लगातार पाँच दिनदेखि परिरहेको वर्षाका कारण कर्णाली नदीले खतराको लेबल पार गरेको छ । सोमबार बिहान ७:३० बजे गरिएको मापनमा कर्णाली नदीको चिसापानी क्षेत्रमा पानीको सतह १२ दशमलव १९८ मिटर मापन गरिएको छ । 

गेजरिडर पार्वती गुरुङले दिएको जानकारी अनुसार सोमबार बिहान ७:३० बजे गरिएको मापनमा कर्णाली नदीमा पानीले खतराको सतह पार गरेको हो । गुरुङका अनुसार १० मिटरलाई सचेत मानिन्छ भने १०.८० मिटरलाई खतराको सतह मानिन्छ । 

---

टीकापुर नगरपालिका-५ शाहीपुरमा कर्णालीको बाँध फुटेर पानी बस्तीमा प्रवेश गरेको छ । त्यस्तै जानकी गाउँपालिका ९ को ख़ैरिफाटा नजिक र पाताभार स्कूल नाजिककै बाधसमेत फुट्‌न लागेको बताइएको छ । 

जिल्ला प्रशासन कार्यालय कैलालीका सूचना अधिकारी शिवराज जोशीले टीकापुरमा करिब ४५० घर परिवारलाई सुरक्षित स्थानमा सरिएको बताउँदै स्थानीय एफएमबाट र माईकिंगबाट सचेत रहन अपील गरिएको बताए । उनले जानकीमा करिब १० घरधुरी सुरक्षित स्थानमा सारिएको बताए ।