झपट बोहरा प्रदेश सभा सदस्यबाट पदमुक्त

धनगढी : माओवादी केन्द्रबाट सुदूरपश्चिम प्रदेश सभा सदस्यमा विजयी भएका झपटबहादुर बोहरा पदमुक्त भएका छन् । माओवादी केन्द्र दल त्याग गरेकाले उनको प्रदेश सभा सदस्य पद गुमेको हो । सोमबार सुदूरपश्चिम प्रदेशसभाको बैठकमा सभामुख अर्जुनबहादुर थापाले दल त्‍याग गरेको पत्र पढेर सुनाएका थिए । 

बोहराले माओवादी केन्द्र दल त्याग गरेकाले नेपाल संविधानको धारा १८० तथा राजनीतिक दल सम्बन्धी ऐन २०७३ र प्रदेश सभा नियमवाली २०७४ बमोजिम प्रदेश सभा सदस्य पद गएको हो । बोहरा अछाम १ (ख) बाट प्रदेश सभा सदस्यमा विजयी भएपछि आर्थिक मामिला तथा योजना मन्त्रीमा नियुक्त भएका थिए । 

---

तर तत्कालीन नेकपामा विवाद बढेपछि उनले प्रधानमन्त्री केपी शर्मा ओली पक्षलाई साथ दिदै मन्त्री पदबाट राजीनामा दिएका थिए । उनी अहिले एमालेको केन्द्रीय सदस्य बनेका छन् । एमालेमा सक्रिय भएपछि माओवादी केन्द्रले उनलाई स्पष्टिकरण सोधेको थियो भने समयमै स्पष्टिकरण प्राप्त नभएको भन्दै चैत ३१ गते पार्टीको साधारण सदस्यसमेत नरहने गरी निष्कासन गरिएको थियो ।