कञ्‍चनपुरमा अक्सिजन नपाएर कोभिड-१९ संक्रमितको मृत्यु

धनगढी : कञ्‍चनपुरमा थप एक जना कोभिड-१९ संक्रमितको मृत्यु भएको छ । जिल्लाको भीमदत्त नगरपालिका–४ का ६० वर्षीय पुरूष कोभिड संक्रमितको मृत्यु भएको हो । श्वासप्रश्वासमा समस्या आएपछि शनिबार महाकाली अस्पतालमा भर्ना भएका ती पुरुषमा संक्रमण पुष्टि भएपछि भेन्टिलेटरमा राखेर उपचार भइरहेको थियो । अक्सिजनको मात्रा कम भएपछि उनको मृत्यु भएको महाकाली अस्पतालले जनाएको छ । 

यस्तै कञ्चनपुरको बेदकोट नगरपालिका–१ का ४८ वर्षीय पुरुषको धनगढीको सेती प्रादेशिक अस्पतालमा कोरोना संक्रमणबाट मृत्यु भएको छ । सेती प्रादेशिक अस्पतालका सुचना अधिकारी दिलिपकुमार श्रेष्ठका अनुसार बैशाख ३ गते कोरोना पुष्टि भएका उनको भेन्टिलेटरमा उपचार भइरहेको थियो । जसपाका संघीय परिषदका सदस्यसमेत रहेका उनको आज दिउसो मृत्यु भएको श्रेष्ठले बताए ।

---