ज्योतिषीसँग साइत जुराएर शपथ लिँदै सुदूरपश्चिम प्रदेशसभा सदस्य

कैलाली- यही पुस ११ गतेका लागि नवनिर्वाचित प्रदेश सभा सदस्यहरूलाई शपथ गराउने मिति तय भएर आवश्यक तयारी गरेको सुदूरपश्चिम प्रदेश सभा सचिवालयले उक्त दिन स्थगित गरेर १५ गतेका लागि मिति तय गरेको छ । 

प्रदेश सभा सचिवालयका सूचना अधिकारी युवराज जैशीले ११ गतेका लागि तयारी गरिएको शपथ १५ गतेका लागि सारिएको बताए । उनले मिति सारिएको विषयमा भने आफूलाई कुनै जानकारी नभएको बताए ।

---

तर, प्रदेश प्रमुख देवराज जोशीको परामर्शमा ज्योतिषीसँग साइत जुराएर १५ गतेका लागि शपथ गराउने दिन तय गरिएको बताइएको छ । 

अब १५ गते सुरुमा प्रदेश प्रमुख जोशीबाट जेष्ठताका आधारमा नवनिर्वाचित प्रदेश सांसद मानबहादुर रावलले शपथ लिनेछन् । सोही दिन अन्य ५२ जना प्रदेश सांसदहरूलाई रावलले शपथ गराउने प्रदेश सभा सचिवालयले जनाएको छ ।