धनगढीमा खुल्यो कृषि मार्ट

कैलाली- धनगढीमा कृषि मार्ट प्रालिको स्थापना गरिएको छ । प्रालिको मंगलबार सुदूरपश्चिम प्रदेशका प्रदेश प्रमुख देवराज जोशीले उद्घाटन गरेका छन् ।

---

मार्टको उद्घाटन गर्दै प्रदेश प्रमुख जोशीले अब किसानहरूले आफ्नो उत्पादन बिक्रीवितरण गर्नका लागि विचौलियाको मारमा पर्नु नपर्ने बताए । उनले किसानले सोझै उत्पादित वस्तु मार्टलाई बिक्रीवितरण गर्ने हुँदा किसानले आफ्नो उत्पादनको उचित मूल्य पाउने बताए ।

व्यवसायी विष्णु बुर्लाकोटीले करिब ५ करोडको लगानीमा धनगढी उपमहानगरपालिका ४ मा एसबी कृषि मार्ट प्रालि संचालनमा ल्याएका हुन् । एकै छानामुनि किसानले उत्पादन गरेका कृषि उपजदेखि कृषि औजार, बिउबिजन र मलखादलगायतका सामान उपलब्ध हुने व्यवसायी बुर्लाकोटीले बताए । 

किसानले उत्पादन गरेका वस्तुहरू सिधै मार्टबाट पाइने भएकाले किसानले आफ्नो सामानको उचित मूल्य पाउने र यसबाट उपभोक्तालाई समेत लाभ हुने बुर्लाकोटीकाे भनाइ छ ।