कैलाली र कञ्‍चनपुरमा थप ६ जना कोभिड–१९ संक्रमितको मृत्यु

धनगढी : कैलाली र कञ्चनपुरमा थप ६ जना कोभिड–१९को मृत्यु भएको छ । जिल्लाको लम्कीचुहा नगरपालिका–१ का ३८ वर्षीय पुरुष र वडा नम्वर १० की ३५ वर्षीया महिलाको मृत्यु भएकोहो । ३८ वर्षीय पुरुषको सोमबार बिहान साढे १ बजे मृत्यु भएको हो । ३५ बर्षीया महिलाको बिहान साढे ४ बजे सेती प्रादेशिक अस्पतालमा उपचारको क्रममा मृत्यु भएको जिल्ला प्रशासन कार्यालय कैलालीका सुचना अधिकारी शिवराज जोशीले बताए । 

यस्तै धनगढी–२ का ४३ वर्षीय संक्रमित पुरुषको प्रादेशिक अस्पतालमा उपचारको क्रममा सोमबार बिहान ५ बजेको समयमा मृत्यु भएको छ । कञ्चनपुरको भिमदत्त नगरपालिका–७ का ६२ वर्षीय पुरुषको पनि कोरोना संक्रमणबाट मृत्यु भएको छ । 

---

यस्तै महाकाली अस्पतालमा उपचाररत भीमदत्त नगरपालिका १३ र १९ का दुई जना संक्रमितको मृत्यु भएको छ । बैशाख १५ गते कोरोना संक्रमण पुष्टि भई होम आइसोलेसनमै बसेकी एक महिलाको आइतबार राति मृत्यु भएको  । यस्तै भीमदत्त नगरपालिका १९ का ३७ वर्षीय पुरुषलाई श्वासप्रश्वासमा समस्या देखिएपछि आइतबार राति अस्पताल ल्याइएको थियो । उनको राति करिब साढे तीन बजे मृत्यु भएको महाकाली अस्पतालका कोभिड सम्पर्क व्यक्ति डाक्टर गोविन्द रोकायाले जानकारी दिए ।