वनभोज गएका युवा मृत फेला

कैलाली- साथीहरूसँग वनभोज गएका एक युवा मृत फेला परेका छन् । बैतडीको दशरथचन्द नगरपालिका-६ शेरामा वनभोज गएका युवा मृत फेला परेका हु्न् । दशरथचन्द नगरपालिका-१० खडेनी घर भएका जीवन बुडाल चौलानी नदी किनारमा मृत फेला परेका प्रहरीले बताएको छ ।

शनिबार दिउँसो साथीहरूसँग वनभोज खान गएका बुडाल राति ९ बजे चौलानी नदीमा मृत फेला परेका प्रहरीले जनाएको छ । 

---

मृतक बुडाल शनिबार आफन्त केही नातेदारसहित दशरथचन्द नगरपालिका–६ शेरा हुँदै चौलानी नदीको जाडा बगडसम्म वनभोजका लागि गएका थिए । 

युवक मृत फेला परेको जानकारी पाएपछि प्रहरी घटनास्थल पुगेको बताउँदै जिल्ला प्रहरी कार्यालय बैतडीका प्रमुख प्रहरी नायब उपरीक्षक प्रेमबहादुर शाहीले घटनाबारे अनुसन्धान गरिरहेको बताए ।

सँगै वनभोज खान गएकाहरूले मृतक नुहाउन एक्लै नदिमा पसेको र पछि नदि किनारमा मृत फेला परेको प्रहरीले जानकारी दिएको छ । मृतकको शव अहिले जिल्ला अस्पताल बैतडीमा राखिएको प्रहरीले बताएको छ ।