गोदावरीले बनाउन लागेको वडा कार्यालय भवन वन कार्यालयले रोक्यो

कैलाली- गोदावरी नगरपालिका आफैँले दुई वटा वन क्षेत्रमा भौतिक संरचना निर्माण गर्न थालेपछि वन कार्यालयले निर्माण कार्य रोकेको छ । गोदावरी नगरपालिका वडा नम्बर ४ र वडा नम्बर १ को सामुदायिक वन क्षेत्रलाई कब्जामा लिएर नगरपालिका आफैले भौतिक संरचना निर्माण गर्न थालेको थियो ।

वडा नम्बर ४ को खैराना सामुदायिक वन र वडा नम्बर १ को चाहना सामुदायिक वन क्षेत्रमा निर्माण हुन लागेका दुवै भौतिक संरचना निर्माण रोक्न भन्दै डिभिजन वन कार्यालय कैलालीले गोदावरी नगरपालिकालाई पत्राचार गरिसकेको डिभिजन वन अधिकृत रामचन्द्र कँडेलले बताए ।

---

नगरपालिकाले कब्जा गरेर भवन निर्माण गर्दै आएको वडा नम्बर ४ को वडा कार्यालय भवन निर्माणका लागि बसन्तपुरस्थित खैराना महिला सामुदायिक वन क्षेत्रलाई भने डिभिजन वन कार्यालयले यही भदौ ८ गतेदेखि नै काम बन्द गर्न लगाएको डिभिजनल वन अधिकृत कँडेलले जानकारी दिए । 

उनले कुनै पनि बहानामा राष्ट्रिय एवं सामुदायिक वनभित्र कसैले पनि भौतिक संरचना बनाउन नपाइने व्यवस्था बिद्यमान रहेको अवस्थामा वनभित्र भौतिक संरचना बनाउने भनेर सर्वपक्षीय र सर्वदलीय भेलाले गरेको निर्णयलाई वन कानूनले नचिन्ने बताए । 

जिल्ला समन्वय समिति धनगढीको ६० तथा गोदावरी नगरपालिकाको ४० प्रतिशत लागत साझेदारीमा वडा नम्बर ४ मा भवन निर्माण गर्न पि.के. कन्सट्रक्सन धनगढी–५ सँग ८७ लाख ४४ हजार तीन सय ६७ मा र काठमाडौँको सिनरजित विल्डर्स प्रालिसँग वडा नम्बर १ मा भवन निर्माण गर्न दुई करोड ६ लाख ८५ हजारमा ठेक्का सम्झौता समेत गरिएको छ। 

सो क्षेत्र तत्काल खाली गराउन वन कार्यालयले सामुदायिक वनलाई यसअघि नै पत्राचार गरिसकेको छ।