आमाको मृत्युपछि बुवाले अर्को बिहे गर्दा चार बालबालिकाको बिचल्ली

बाजुरा : बडिमालिका नगरपालिका–२ माझीगाउँमा चार बालबालिकाको बिचल्ली भएको छ । आमाको मृत्युपछि बुवाले अर्को बिहे गरेर भारत गएपछि चार भाइ बहिनीको बिचल्ली भएको वडाध्यक्ष डम्मर महतले जानकारी दिए । 

अलपत्र पर्नेमा सात वर्षीया करुणा नेपाली, छ वर्षीया कोपिला, चार वर्षीया स्माया नेपाली र तीन वर्षीय धुव्रराज नेपाली छन् । आमा रेखा नेपालीको उपचारका क्रममा दुई वर्ष पहिले भारतमा मृत्यु भएको थियो भने बुवा विनय नेपालीले अर्को बिहे गरेर भारत गएका छन् ।

---

यतिबेला नाबालक चार भाइबहिनी बुढा बाजे अर्जुन नेपाली र बज्यै बिष्णाको संरक्षणमा छन् । आर्थिक अवस्था निकै कमजोर रहेको नेपाली वृद्ध दम्पतिलाई नाबालक नाति नातिनी पाल्न निकै समस्या भएको छ । गाउँभरि डुलेर अरुसँग मागेर नाति नातिनाको पेट भर्ने काम गरेको वृद्धा बिष्णाले बताइन् । 

कोरोनाको कहर बढेसँगै लकडाउनका कारण उनीहरुमा झनै समस्या थपिएको छ । लकडाउन नहुनु पहिला ज्याला मजदूरी गरेर पाल्थे, अहिले भने गाउँभरि मागेर पाल्ने गरेको बाजे अर्जुनले बताए । “सबै सानै छन्, जेठी करुणा गाउँकै सत्यवादी मावि कक्षा २, माइली कोपिला नेपाली कक्षा १ मा पढ्ने गरेकी छन्, बाँकी भने सानै रहेका छन्”, उनले भने । 

अर्जुनको परिवारले माथिल्लो जातिको काम गरेवापतको अन्नले केही दिनलाई खान पुुगे पनि अहिले भने परिवार पाल्न निकै समस्या भएको बताए । वडाध्यक्ष महतले भने, “आफूहरुले पनि कहिलेकाहीँ खाद्यन्न मिलाउने गरिरहेका छौँ, यिनीहरुको पढाइ त टाढाको विषय हो छाक टार्न पनि समस्या भएको छ, यी साना बालबालिकाको सहयोगका लागि पहल गर्नका लागि आग्रहसमेत गरेका छौँ ।”

नगरपालिकाको महिला तथा बालवालिका शाखा प्रमुख केशरी रोकायाले त्यस्ता अलपत्र परेका बालबालिकालाई यो आर्थिक वर्षमा प्रतिव्यक्ति रु एक हजार सहयोग गरेको बताए । “युनिसेफको सहयोगमा एक हजार सहयोग गरेका छौँ, बाँकी नगरपालिकामा कोष स्थापना हुन लागेको छ, त्यसपछि सहयोग गर्न सकिने छ ।” रासस