भ्रष्टाचारी खोज्न सिंहदरबार गए पुग्छ : गगन थापा

धनगढी : नेपाली काँग्रेसका नेता गगन थापा सरकारविरुद्द खनिएका छन्। सोमबार धनगढीमा आयोजित विरोध सभालाई सम्बोधन गर्दै उनी सरकारविरुद्ध खनिएका हुन्। उनले वर्तमान सरकारले शासन गर्ने वैधतासमेत गुमाएको आरोप लगाए ।

संघीयता कार्यान्वयनको लागि ठूलो अवसर वर्तमान कम्युनिष्ट सरकारले पाए पनि भ्रष्टाचारमा लिप्ट भएको उनको भनाइ थियो। उनले भने,‘ भ्रष्टाचारी खोज्न कहीँ जानुपर्दैन, बालुवाटार गए पुग्छ। सिंहदरबार गए पुुग्छ ।’

---

उनले सरकार अपराधलाई संरक्षण गरिरहेको समेत आरोप लगाए। निर्मला पन्तदेखि निर्जला चौधरीलाई बलात्कार गर्ने, हत्या गर्नेलाई संरक्षण गर्नेमा सरकारका गृहमन्त्री रहेको नेता थापाको भनाइ छ। थापाले लाचार र निरीह मुख्यमन्त्रीका कारण सुदूरपश्चिमका जनताले दुःख पाएको बताए।

मुख्यमन्त्रीको लाचारी र निरिहताका कारण सुदूरपश्चिमका जनताको परिवतर्नन र विकासको अपेक्षा पुरा नभएको नेता थापाको आरोप थियो।

‘सुदूरपश्चिममा लेखराज भट्ट र भीम रावलको पहलमा सेनिटाईजर बाडियो भनेर समाचार आउँछ। प्रदेश सरकारले के गर्यो ?’ उनले अगाडि भने, ‘यो प्रदेशको मुख्यमन्त्रीले संघीयताको भारी बोक्न सकेनन्। त्यसको भारी संघीयतालाई नबोकाउ, प्रधानमन्त्री र नेकपालाई बोकाउ ।’

उनले राष्ट्रपति विद्यादेवी भण्डारीले आफूलाई महारानी सम्झिन थालेको भन्दै आलोचना गरे ।