धनगढी : नेकपा सुदूरपश्चिमको बैँक खातामा रहेको ३० लाख रुपैयाँ दाहाल–नेपाल समूहका नेता डा. भीम रावलले गायब पारेको आरोप लागेको छ । नेकपा सुदूरपश्चिमका अध्यक्ष कर्णबहादुर थापाले रावलले ३० लाख गायब पारेको आरोप लगाएका हुन् ।

‘नेकपालाई विभाजन गर्न १९ पृष्ठको लिखत तयार पार्न मुख्य भूमिका खेलेका रावललाई पार्टी विभाजन किन चाहिएको रहेछ भन्ने कुरा सुदूरपश्चिम प्रदेश कमिटीको नाममा रहेको ३० लाख गायब पारेपछि स्पष्ट भएको छ ।’ थापाले सामाजिक सन्जाल फेसबुकमा लेखेका छन् । 

---

पार्टीको बैक खाता अध्यक्षको हैसियतले आफ्नो, कार्यालय सचिव दिनेशचन्द्र सुवेदी र सचिव नेपबहादुर चौधरीको नाममा रहेको बताउँदै उनले पार्टी फूटको तहमा पुगेपछि सुवेदी र चौधरीलाई पार्टी सम्पत्ति साझा भएको र बैकबाट पैसा निकाल्नको लागि हस्ताक्षरको दुरुपयोग नगर्नु भनेको बताए । 

थापाले अगाडि भने, ‘पार्टी कार्यालयमा तालाबन्दी भएका कारणले कृषि विकास बैंक धनगढीका मेनेजरलाई पार्टीको नामबाट चेक आएमा पैसा नदिनु होला भनेर पनि भनेको थिएँ । तर डा. भीम रावलको दबाबमा पार्टीको ३० लाख गायब पारिएको छ ।’

३० लाख गायब पारिनुलाई अपराधिक मानसिकताको उपजको रुपमा लिएको थापाले बताए । यता नेकपा सुदूरपश्चिमका इन्चार्ज भीम रावलले भने पार्टी अध्यक्ष, सचिव र कार्यालय सचिवको नामबाट खाता सञ्चालन भएकोले त्यस्मा आफ्नो कुनै संग्लनता नरहेको बताए । नेकपा विभाजन भएपछि सुदूरपश्चिममा पार्टी कार्यालयसमेत कब्जा गर्न थालिएको छ । धनगढीमा रहेको पार्टीको जिल्ला कार्यालय र प्रदेश कार्यालय दाहाल–नेपाल समूहले कब्जा गरेको थियो ।