मोटरसाइकल ठोक्किँदा दुई जनाको मृत्यु

महेन्द्रनगर : कञ्चनपुरको कृष्णपुरमा मोटरसाइकल ठोक्किँदा दुई जनाको मृत्यु भएको छ । पूर्व-पश्चिम राजमार्ग अन्तर्गत कृष्णपुर नगरपालिका-५ आम्खैयामा मोटरसाइकल दुर्घटना हुँदा दुई जनाको मृत्यु भएको हो । थप दुई जना घाइते भएको पनि जिल्ला प्रहरी कार्यालय कञ्चनपुरले जनाएको छ ।

दुर्घटनामा से ६ प ३१६७ नम्बरको मोटरसाइकल चालक धनगढीको गोदावरी राइसमिल नजिक बस्ने २५ वर्षीय आशिष जोशी र सु. प. प्र. ०१ ०० ७१५७ नम्बरको मोटरसाइकल चालक कृष्णपुर नगरपालिका-२ वाणीका ३५ वर्षीय जनक बोहराको मृत्यु भएको हो ।

---

जिल्ला प्रहरी कार्यालयका निमित्त प्रमुख प्रहरी नायब उपरीक्षक अमरबहादुर थापाका अनुसार दुर्घटनामा गम्भीर घाइते जोशीको धनगढीस्थित निशंर्ग अस्पताल र बोहराको सेती प्रादेशिक अस्पतालमा मृत्यु भएको हो । 

दुवै मोटरसाइकलको पछाडी बसेका कैलालीको लम्कीचुहा नगरपालिकाका २३ वर्षीय निश्चल राठोर र अभिषेक चुनारा घाइते भएका छन् । उनीहरुको धनगढीमा उपचार भइरहेको छ । (रासस)