धनगढीमा एमालेका दुई समूहबीच विवाद, पार्टी कार्यालयमा प्रहरी परिचालन

धनगढी : धनगढीमा नेपाल कम्युनिष्ट पार्टी (एमाले) का दुई समूहबीच विवाद बढेको छ । बुधबार बिहान सुदूरपश्‍चिम प्रदेश कार्यालयमा माधवकुमार नेपाल समूहले नेकपा एमाले लेखिएको बोर्ड राखेपछि विवाद बढेको हढेको हो । अहिले प्रधानमन्त्री केपी शर्मा ओलीका कार्यकर्ताहरूले उक्त बोर्ड हटाएका छन् । उक्त बोर्ड हटाउँदै प्रधानमन्त्री ओली समूहका कार्यकर्ताहरूले अर्को बोर्ड राख्‍न थालेपछि विवाद बढेको हो । 

ओली समूहले राखेको बोर्डमा पनि नेकपा एमाले नै लेखिएको छ । माधव समूहका नेताले प्रतिशोध साँध्‍न काम भइरहेको बताए । विवाद बढेपछि प्रदेश पार्टी कार्यालयमा प्रहरी परिचालन गरिएको छ । 

---

सर्वोच्च अदालतको आइतबारको फैसलाले नेकपा एमाले र नेकपा माओवादी ब्युँताइदिएपछि दुई फरक-फरक पार्टी बनेका छन् । दुई फरक-फरक पार्टी बनेसँगै केन्द्रदेखि जिल्ला र प्रदेशहरूमा बोर्ड राख्‍ने र कार्यालय स्थापना गर्ने क्रम चलिरहेको छ ।

पार्टी कार्यालयमा लेखराज भट्ट नेकपा एमाले सुदूरपश्‍चिम इन्चार्ज लेखिएको नेमप्लेट राखिएको छ भने कर्णबहादुर थापा अध्यक्ष रहेका छन् । यसअघि नेकपा एकतापछि भीम रावल इन्चार्ज रहेका थिए । इन्चार्जको बिषयमा पनि दुई समूहबीच विवाद भइरहेको छ ।