दोहोरो अंकले बढ्यो नेप्से

काठमाडौं :नेपाल स्टक एक्स्चेन्ज (नेप्से) परिसूचक आइतबार दोहोरो अंकले बढेको छ । १२.४९ अंकले बढेको नेप्से १,६४८.५८ अंकमा अडिएको छ । पुँजीबजारमा ‘क’ वर्गका कम्पनीहरुको धितोपत्रको अवस्था मापन गर्ने सूचक ‘सेन्सेटीभ इन्डेक्स’ १.५७ अंकले बढेको छ ।

आइतबार बैंकि बैंकिङ र विकास बैंक उपसमूहका परिसूचकबाहेक अन्य सबै उपसमूहका परिसूचकहरू उकालो लागेका छन् । आइतबार नेपाल स्टक एक्सचेन्जमा कारोबार भएका हिमालयन डिस्टिलरीको सेयरमूल्य  ९.९७ प्रतिशतले बढेर २,१६१ रुपैँयामा कारोबार भएको छ । जसलाई साल्ट ट्रेडिङ कर्पोरेसनले पछ्याएको छ । 

---

साल्ट ट्रेडिङ कर्पोरेसनको सेयर मूल्य प्रतिकित्ता तीन सय ८७ रुपैँया (९.९५ प्रतिशत) ले बढेको छ । म्यानुफ्याक्चरिङ र ट्रेडिङ उपसमूहका कम्पनीहरुको लाभांश घोषणाको आशामा यी कम्पनीहरूको सेयरको माग बढेको हो । आइतबार जलविद्युत् र जीवन बिमा कम्पनीहरूको सेयरमा पनि सुधार देखिएको छ ।

आइतबार नेप्सेमा १९८ कम्पनीको ४१ हजार सात सय ६७ कारोबारबाट ३ अर्ब ५२ करोड ६७ लाख मूल्य बराबरका एक करोड आठ लाख ६३ हजार चार सय ५६ कित्ता सेयर किनबेच भएको थियो ।