नेप्से परिसूचक २ हजार अंकमुनि

काठमाडौँ- नेपाल स्टक एक्सचेञ्ज (नेप्से) साताको पहिलो कारोबारमा ३३ अंकले घटेको छ। आइतबार बजार परिसूचक ३३.३६ अंक घटेको हो । ३३ अंक घट्दा सेयर बजार परिसूचक २ हजार अंकमुनि झरेको छ।

गत साताभरमा ४५.६१ अंकले घटेर २०२२.६२ विन्दुमा पुगेर बजार आज थप ३३ अंक घटेर १९८९.२६ मा झरेको छ। 

---

बजार परिसूचक १.६५ प्रतिशत तथा ‘क’ वर्गका कम्पनीहरूको मापक सेन्सेटिभ इन्डेक्स ६.०५ घटेर ३८५.७० मा झरेको छ।

३३ अंकले घटेको बजारमा आज २ अर्ब ५ करोड ९७ लाख ३७ हजार १ सय ३ रुपैयाँ बराबरको सेयर खरिद बिक्री भएको छ। यस्तै ६१ लाख ४८ हजार ३ सय ४१ कित्ता सेयर ४३ हजार ९ सय ७७ पटकमा खरिद बिक्री भएको छ। उप-समूहतर्फ म्यचुअल फण्ड बाहेक बाँकी समूहको सेयर मूल्य घटेको छ ।

घट्दो बजारमा आज कारोबार भएका जम्मा ५ कम्पनीको सेयर मूल्य बढेको छ भने १ सय ८२ कम्पनीको सेयर मूल्य घटेको छ।

राँधी विद्युत कम्पनी, एनएमबि हाइब्रिड फण्ड, एनआइबिएल प्रगती फण्ड,सिद्धार्थ इन्भेष्टमेन्ट, नबिल डिबेन्चर लगायतका कम्पनी उच्च कमाउने कम्पनीमा परेका छन् ।