बिदापछिको पहिलो कारोबारमा १६ अंकले बढ्यो सेयर बजार

काठमाडौँ- नेपाल स्टक एक्सचेञ्ज (नेप्से) परिसूचक सोमबार १६ अंकले बढेको छ। तिहार, छठ पछिको पहिलो कारोबारमा सेयर बजार परिसूचक १६.३९ अंकले उकालो लागेको हो । कात्तिकमा अन्तिम कारोबारको दिन नेप्से सूचक १८५८.४९ विन्दुमा बन्द भएको सेयर बजार परिसूचक आज १६ अंक बढेर १८७४.८७ मा उक्लिएको छ ।

आज बजार परिसूचक ०.८८ प्रतिशत तथा 'क' वर्गका कम्पनीहरूको मापक सेन्सेटिभ इन्डेक्स ४.९३ बढेर ३७०.८६ अंकमा उक्लिएको छ।

---

१६ अंकले बजार बढ्दा सोमबार २२४ कम्पनीको ६९ करोड ७३ लाख १७ हजार ६ सय ११ रुपैयाँ बराबरको सेयर खरिद बिक्री भएको छ। २५ लाख ७४ हजार ९ सय ७५ कित्ता सेयर १७ हजार ७ सय ४८ पटकमा खरिद बिक्री भएको छ । दोहोरो अंकले बजार बढ्दा सोमबार विकास बैंक बाहेक बाँकी १२ समूहको सेयर मूल्य बढेको छ। विकास बैंक समूह भने ०.३९ प्रतिशतले घटेको छ ।

बजार बढ्दा कारोबार भएका मध्ये ११० कम्पनीको सेयर मूल्य बढेको छ। भने ६५ कम्पनीको सेयर मूल्य घटेको छ। आज सयपत्रि हाइड्रो लिमिटेडको सेयर मूल्यमा सर्किट ब्रेकर लागेको छ।