काठमाडौँ – धितोपत्र बजार यस साताको कारोबारमा ११४ अंकले बढेको छ । साताभर भएको कारोबारमा बजार परिसूचक ११४.७५ अंकले बढेको हो । गत साताको अन्तिम कारोबार पश्चात २०२९.०३ अंकमा बन्द भएको नेप्से यो साता २१४३.९३ अंकमा कायम रहेको छ। गत साताभरको कारोबारमा बजार १६१.८२ अंकले बढेको थियो ।

गत सातादेखि सेयर बजारमा लगानीकर्ता विश्वास बढ्दै जाँदा सेयर बजार उकालोतर्फ बढ्दै गएको छ। सरकार गठनसँगै नयाँ अर्थमन्त्री आउनु, बैंकिङ प्रणालीमा तरलता बढ्दै जानु र ब्याजदर घट्ने संकेतले लगानीकर्तामा सकारात्मक मनोबल बढ्दा समग्र बजार २ सातादेखि उल्लेख्य बढेको छ ।

---

कारोबारको दिन	अंक घटबढ	कारोबार रकम
आइतबार	१७.२६	४ अर्ब ४ करोड
सोमबार	१७.५६	२ अर्ब ९६ करोड
मंगलबार	३.०३	३ अर्ब ४५ करोड
बुधबार	६४.८७	३ अर्ब ५० करोड
बिहीबार	१८.०९	५ अर्ब ४ करोड
जम्मा	११४.७५	१८ अर्ब ९९ करोड

 

साताको पहिलो र दोश्रो कारको बारमा १७/१७ अंकले बढेको बजार तेश्रो कारोबारमा भने ३ अंकले घट्न पुग्यो । साताका पाँच कारोबार दिन मध्ये एक दिन सामान्य अंकले घटेको बजार अन्य दिन भने बढेको छ।

यस्तै यस साता सेन्सेटीभ इन्डेक्स ५.०९ प्रतिशत बढेको छ भने फ्लोट इन्डेक्स ५.७७ प्रतिशत र सेन्सेटिभ फ्लोट इन्डेक्स ६.४३ प्रतिशत बढेको छ । साताको पहिलो कारोबारको दिन आइतबार १७.२६ अंकले बढेर साताको सकारात्मक सुरुवात भएको थियो । सो दिनको कारोबारमा ४ अर्ब ४ करोड रूपैयाँको १ करोड ८ लाख ८० हजार कित्ता सेयर खरिद बिक्री भएको थियो ।

साताको दोश्रो कारोबारको दिन सोमबारमा पनि बजार १७.५६ अंकले बढ्यो । सो दिन अघिल्लो दिनको तुलनामा कारोबार रकममा कमी आएको थियो । सोमबार २ अर्ब ९६ करोड ९ लाख रूपैयाँ बराबरको ८२ लाख ७१ हजार कित्ता सेयर खरिद बिक्री भएको थियो ।

मंगलबार भने सेयर बजार सामान्य अंकले गिरावट आएको छ । मंगलबार बजार ३.०३ अंकले घट्यो। सो दिनभने बजारमा अघिल्लो दिनको तुलनामा कारोबार रकममा बढोत्तरी भएको छ । मंगलबार ३ अर्ब ४५ करोड रुपैयाँ बराबरको ८२ लाख २२ हजार कित्ता सेयर खरिद बिक्री भएको छ।

साताको चौथो कारोबारको दिन बुधबार बजार पुन: उल्लेख्य बढ्न पुग्यो । बुधबार बजार ६४.८७ अंकले बढेको थियो । सो दिन कारोबार रकम भने ३ अर्ब ५० करोड रूपैयाँको ८७ लाख ३३ हजार कित्ता सेयर खरिद बिक्री भएको थियो ।

यस्तै साताको अन्तिम कारोबारको दिन बिहीबार बजार १८.०९ अंकले बढेको छ। बिहीबार बजार कारोबार रकममा भने उच्च बढोत्तरी भएको थियो । अन्तिम कारोबारको दिन ५ अर्ब ४ करोड ७ लाख ४० हजार रूपैयाँको १ करोड २५ लाख ८१ हजार कित्ता सेयर खरिद बिक्री भएको थियो ।

यस साता नेप्सेसँगै कारोबार रकम पनि बढेको छ । यस साता बजारमा दैनिक औसतमा ३ अर्ब ८० करोड रूपैयाँ बराबरको सेयर खरिद बिक्री भएको छ । गत साता दैनिक औषतमा २ अर्ब ७५ करोडको सेयर खरिदबिक्री भएको थियो।

बजार पुँजीकरण

गतसाता २ खर्ब ३४ अर्ब रूपैयाँ बढेर २९ खर्ब ३४ अर्ब रूपैयाँमा कायम रहेको सेयर बजार यस साता ३१ खर्ब १ अर्ब ४५ करोडमा उक्लिएको छ। साताभरमा सेयर लगानीकर्ताको १ खर्ब ६७ अर्ब सम्पति बढेको छ।

उप-सूचकतर्फ

१३ उप-सूचक समूहमध्ये यस साता व्यापार उप-सूचकको सर्वाधिक २०.०६ प्रतिशत बढेको छ । यस्तै साता अन्य उप-सूचकको परिसूचक सबैभन्दा कम ०.८६ प्रतिशत बढेको छ । 

व्यापारपछि धेरै मूल्य बढ्नेमा होटल तथा पर्यटन उप-सूचक रहेको छ । सो उप-सूचक १४ प्रतिशतले बढेको छ । तेस्रो स्थानमा रहेको माइक्रोफाइनान्स उप-सूचक ११.५ प्रतिशतले बढेको छ । 

उप-सूचक यो साता

उप-सूचक	वृद्धि प्रतिशतमा
जीवन बीमा	५.०८
निर्जीवन बीमा	९.९९
उत्पादन	७.७६
माइक्रोफाइनान्स	११.५६
विकास बैंक	५.७२
होटल तथा पर्यटन	१४.१४
जलविद्युत्	७.६३
व्यापार	२०.०६
फाइनान्स	६.७०
अन्य	०.८३
बैंकिङ	२.१९