ओम मेगाश्री फर्मास्युटिकल्सको आइपीओ फागुन ५ गतेसम्म भर्न मिल्ने

काठमाडौँ- ओम मेगाश्री फर्मास्युटिकल्स लिमिटेडको आइपीओमा आवेदन दिन अबको दिन दिन अर्थात यहि फागुन ५ गते सोमबारदेखि बन्द हुनेछ । माघ २१ गतेदेखि खुला भएको आइपीओमा वैदेशिक रोजगारीमा गएका नेपालीले आवेदन दिन सक्नेछन् । 

यो आइपीओमा १२ करोड ४३ लाख ८२ हजार रुपैयाँ बराबरको आवेदन परिसकेको छ । सीडीएसका अनुसार फागुन १ गते बिहीबार साँझ ५ः०६ बजेसम्म ४७ हजार ६४५ जनाले १२ लाख ४३ हजार ८२० कित्ताका लागि आवेदन दिएका छन् । यो मागभन्दा ६.९१ गुणा बढी आवेदन हो । 

---

आइपीओको निष्कासन तथा बिक्री प्रबन्धकको रुपमा प्रभु क्यापिटल लिमिटेड रहेको छ । आवेदन दिने न्यूनतम कित्ता १० र अधिकतममा १० हजार कित्तासम्मका लागि आवेदन दिन सकिनेछ । 

वैदेशिक रोजगारीमा रहेका नेपालीले धितोपत्र बोर्डबाट स्वीकृत प्राप्त सम्पूर्ण आस्वा सदस्य बैंक तथा वित्तीय संस्थाहरु र तिनका तोकिएका शाखा कार्यालय तथा मेरो सेयर अनलाइनबाट समेत आवेदन दिन सक्नेछन् ।

कम्पनीले पहिलो चरणमा वैदेशिक रोजगारीमा रहेका नेपालीका लागि आइपीओ बिक्री खुला गरेको हो । कम्पनीले १ लाख ८० हजार कित्ता सेयर श्रम स्वीकृति लिई वैदेशिक रोजगारीमा रहेका नेपाली नागरिकको लागि आइपीओ जारी गरेको हो ।  

ओम मेगाश्रीले नेपाल धितोपत्र बोर्डबाट कुल १८ लाख कित्ता प्राथमिक सेयर निष्कासनको अनुमति पाएको थियो । जसको १० प्रतिशत अर्थात १ लाख ८० हजार कित्ता वैदेशिक रोजगारीमा रहेका नेपालीहरुका लागि बिक्री खुला गरेको हो । 

त्यस्तै, कम्पनीले कुल निष्कासनको ३ प्रतिशतले हुने ५४ हजार कित्ता सेयर कम्पनीमा कार्यरत कर्मचारीहरुको लागि र ५ प्रतिशतले हुने ९० हजार कित्ता सेयर सामुहिक लगानी कोषको लागि सुरक्षित राखेको छ । बाँकी १४ लाख ७६ हजार कित्ता सेयर सर्वसाधारणमा जारी गर्नेछ ।