दुई दिन लगातार घटेको सेयर बजार साताको अन्तिम कारोबार दिन १७.५७ अंकले बढ्यो

काठमाडौँ– यो साता लगातार घटेको नेपाल स्टक एक्सचेन्ज (नेप्से) परिसूचक साताको अन्तिम कारोबार दिन भने १७.५७ अंकले बढेर ३,०९४.०१ बिन्दूमा पुगेको छ । नेप्सेमा सूचीकृत ‘क’ वर्गका सेयरको मूल्य मापन गर्ने ‘सेन्सेटीभ इन्डेक्स’ पनि ०.६ प्रतिशत अर्थात् ३.४ अंकले बढेको छ । यो साताको शुरुवाती दिन आइतबार र सोमबार सार्वजनिक विदाका कारण बजार बन्द थियो । नेपाल राष्ट्र बैंकले सेयर धितोमा प्रदान गरिने कर्जा सीमाभित्र नियमित गर्ने अवधि थोरै राख्ने हल्लाका कारण मंगलबार र बुधबार बजारमा बिक्रीको चाप देखिएको थियो । 

राष्ट्र बैंकले एक वर्षभित्र तोकेको सेयर धितोमा ऋण प्रति ऋणी १२ करोड र एउटा वित्तीय संस्थाबाट ४ करोड रुपैयाँमा ल्याइसक्नुपर्ने गरी मंगलबार साँझ परिपत्र जारी गरिसकेको छ । यसका बाबजूद बुधबार बजार घटेको थियो । 

---

नेप्से परिसूचक मंगलबार ५६.०३ अंकले र बुधबार ४८.४२ अंकले खस्किएर ३०७६.४४ अंकमा आइपुगेको थियो । आज सेयर बजारमा प्रभुत्व राख्ने बैंकिङ्ग र बीमा समूहका परिसूचक ओरालो लागे पनि जलविद्युत्, विकास बैंक, वित्त कम्पनी, लघुवित्त र होटल तथा पर्यटन समूहका परिसूचक उकालो लागेका छन् । आज नेप्सेमा कारोबार भएका मध्ये १०२ कम्पनीको सेयर मूल्य उकालो लागेको छ भने ७९ कम्पनीको मूल्य घटेको छ । 

बिहीबार नारायणी डेभलपमेन्ट बैंक, श्री इन्भेष्टमेन्ट फाइनान्स, गुहेश्वरी मर्चेन्ट बैंक एण्ड फाइनान्स, अरुण भ्याली हाइड्रोपावर, कर्पोरेट डेभलपमेन्ट बैंक, आँखुखोला जलविद्युत् कम्पनी, घलेम्दी हाइड्रो र जीवन विकास लघुवित्त वित्तीय संस्थाको सेयर कारोबारमा सर्किट ब्रेकर लागेको छ । 

अरुण  भ्याली हाइड्रोपावरको ९३ करोड ८४ लाख रुपैयाँ मूल्यका १३ लाख ३० हजार ८ सय आठ कित्ता सेयर चार हजार सात सय २६ ओटा कारोबारमार्फत खदिर बिक्री भएको छ । बिहीबार सेयर बजारमा कारोबार रकम, सेयर संख्या र कारोबार संख्या तीनै हिसाबले यो सबैभन्दा ठूलो कारोबार हो । 

बिहीबार नेप्सेमा २ सय ३२ कम्पनीको १३ अर्ब ४२ करोड १९ लाख ७४ हजार मूल्यका २ करोड १६ लाख ९० हजार पाँच सय ८५ कित्ता सेयर १ लाख ३० हजार नौ सय ३८ ओटा कारोबारमार्फत् खरिद–बिक्री भएको छ ।