सेयर बजारमा ऐतिहासिक रेकर्ड, ४१ अंकले बढेर २२३५ बिन्दूमा नेप्से

काठमाडौं : सेयर बजार सूचक नेप्से परिसूचक २२३५ बिन्दूको ऐतिसासिक उचाइमा पुगेको छ । ४१ दशमलव अंकले बढेर नेप्सेले कीर्तिमानी उचाइ कायम गरेको हो ।

प्री ओपन सेसन मै २२ सय नाँघेको सेयर बजार निरन्तर उकालो लागेको थियो । करिब १ बजे नेप्से २२८८ बिन्दूमा समेत पुगेको थियो । अन्तर दिवसीय कारोबारमा यो अहिलेसम्मकै उच्चतम् बिन्दू हो ।

---

नेप्सेलाई कीर्तिमानी उचाइमा पुर्‍याउन बैंकिङ समूहको योगदान ठुलो रह्यो । बैंकिङ समूहको परिसूचक झन्डै ६० अंकले बढ्यो । विकास बैंक समूहको परिसूचक पनि करिब ४ प्रतिशतले बढेको छ । जीवन बीमा समूहबाहेक सबै समूहका परिसूचकमा हरियाली थियो ।

एकैदिन ६ वटा कम्पनीको सेयर ९ प्रतिशतभन्दा बढीले वृद्धि भएको छ । सबैभन्दा बढी १० प्रतिशतले प्रभु लाइफ इन्स्योरेन्सको सेयर बढेको छ । १९ अंकले बढेको प्रभु लाइफ प्रति कित्ता २०९ रुपैयाँमा कारोबार भइरहेको छ । नारायणी डेभलपमेन्ट बैंकको सेयर ६३ अंकले बढेको छ । आरम्भ चौतारी लघुवित्त, कुमारी बैंक, युनाइटेड फाइनान्स, कर्पोरेट डेभलपमेन्ट बैंको सेयर मूल्यमा उच्च वृद्धि भएको छ ।
नेप्से परिसूचकसँगै सेयर कारोबार पनि बढेको छ । आइतबार ६ अर्ब ३२ करोड रुपैयाँ बराबरको सेयर कारोबार भएको छ । डेढ करोड कित्ता बराबरको सेयर कारोबार ५७ हजार १७१ पटक भएको छ ।