पोखरा - पोखराको सहिद चोकमा हिजो-आज दिनहुँ नौमती बाजाको धुन सुनिन्छ । विहे न लगन चौतारोको फेदमा नौमती घन्काउने समूह भने फेरिरहन्छन् । 

चौतारीको नजिकै निर्वाचन अधिकृतको कार्यालयमा पोखरा महानगरपालिकाको मतगणना चलिरहेको छ । मत गनिरहेको स्थलबाट सूर्यमा...रुखमा... कलममा.... यस्तै-यस्तै आवाज सुनिएपछि जसको मत धेरै हुन्छ र जित्ने निश्चित भएपछि त्यही पार्टीले डाक्छन्, नौमती बाजा समूह । 

---

डाकिएको नौमती बाजा समूहले सहनाई, ढोलक, दमाहा, सानो दमाहा, बाउँताल, ट्याम्को, झ्याली, नरसिंहा र कर्लाल घन्काउँछन् र नचाउँछन् पार्टीका नेता कार्यकर्ता । त्यसवापत् उनीहरूले बोलाएको पार्टीका नेताहरूबाट पैसा लिन्छन् । जेठ लगनको महिना नए पनि नौमती बाजा समूहहरूलाई कमाईखाने गतिलो माध्यम बनेको छ, स्थानीय तह निर्वाचन २०७९ । 

निर्वाचनको मतगणना सुरु भएको ३ दिनदेखि पोखराको शहिदचोकमा नौमती बाजा घन्किरहेको छ । आइतबार मात्र पोखरा पृथ्वीचोकमा कार्यालय रहेको इन्द्रेणी नौमती मगर बाजा समूहले २ पटक बाजा घन्कायो । 

पहिले पोखरा १० को विजयी र्‍याली र पछि पोखरा १६ को पनि र्‍यालीमा नौमती बजाउन भ्याए । उनीहरूलाई कुन् पार्टीले जित्यो भन्नेको सरोकार छैन । 

यो समूहलाई पैसा कमाउन कै ध्याउन्न छ । आफूहरूको कुनै पार्टी नभएको इन्द्रेणी नौमती मगर बाजा समूहका सदस्य हिमाल गर्वुजाले बताए । ‘हाम्रो कुनै पार्टी छैन, कुनै दलसँग नजिक पनि छैनौं,’ उनले भने, ‘हामीलाई त जसले बोलायो उसैकोमा गएर बजाउने हो, पैसा लिएर आउने हो ।’

चुनावका कारण लगन नभएको समयमा पनि कमाइ राम्रो भएको उक्त समूहका अर्का सदस्य रामचन्द्र थापाले बताए । ‘जेठ महिनामा त्यति लगन पनि हुँदैन् हामी अरु अरु काममा जानुपथ्र्यो,’ उनले भने, ‘यो चुनावको र्‍यालीले गर्दा कमाई राम्रै भएको छ ।’ 

विवाहको समयमा एक दिनको २५ हजार लिने गरेकोमा अहिले एउटा पार्टीले बोलाएमा २५ हजारमा मिलाएर लिने गरेको उनले सुनाए । एकैदिन २/३ वटा पार्टीको र्‍यालीमा जाने भएका कारण केही सस्तोमा पनि गरेको उनले बताए ।
 
निर्वाचनको र्‍यालीमा विवाहमा जस्तो समस्या नहुने पनि थापाले सुनाए । ‘बिहेमा जाँदा त बिहानै जानुपथ्र्यो राति आउने खाने बस्ने ठेगान हुन्थेन,’ उनले भने, ‘यहाँ त धेरै सजिलो छ एकै दिनमा २/३ ठाउँमा जान भ्याइन्छ अनि समयमै घर जान पाइन्छ ।’ 

उनीहरूले एक दिनमा कमाएको पैसा २/३ हजार मर्मतका लागि छुट्याएर अरु सबै दामासाही रूपमा बाँड्ने गरेको उनले बताए । उनीहरूको समूहमा १८ जना सदस्य छन् भने जसमध्ये ७ जना महिला छ । इन्द्रेणी समूह जस्तै पोखराका धेरै पञ्चेबाजा तथा नौमती बाजा समूहले र्‍यालीमा बाजा घन्काउने गरेका छन् ।