कास्की र कैलालीमा भारी वर्षा, उच्च सतर्कता अपनाउन आग्रह

काठमाडौँ - कास्कीको लुम्ले र जुमलेटी वर्षामापन केन्द्रमा पछिल्लो ६ घण्टा अति भारी वर्षामापन भएको छ । आसपासको साना खोलामा आकस्मिक बाढी आउन सक्ने र कमजोर तथा भिरालो जमिनमा पहिरो जान सक्ने भएकाले बिहान ९ बजेसम्म उच्च सतर्कता अपनाउन बाढी पूर्वानुमान महाशाखाले आग्रह गरेको छ ।

महाशाखाका अनुसार आगामी ३ दिन कोशी, नारायणी, कमला, बागमती र यसका सहायक नदीहरुमा जल सतह उल्लेख्य बढ्ने र केहीमा सतर्कता तह आसपास पुग्न सक्ने,  कर्णाली, महाकाली, कन्काई,  पश्‍चिम राप्ती, बबई र यसका सहायक नदीहरूको बहाव बढ्ने तथा सतर्कता तह भन्दा तलै रहने पूर्वानुमान छ।

---

त्यस्तै कैलाली आसपास केही स्थानमा भारी बर्षा भई कान्द्रा नदी बाढी मापन केन्द्र कैलालीमा जलसतहले सतर्कता तह पार गरेको र बढ्दो रहेकाले नदीतटीय क्षेत्र र होचा डुबान भइरहने क्षेत्रमा बिहान १० बजेसम्म विषेश सतर्कता अपनाउन जल तथा मौसम विज्ञान विभागले आग्रह गरेको छ ।