संक्रमितको सम्पर्कमा आएका सबैलाई पीसीआर गर्न काठमाडौँ महानगरको आग्रह

काठमाडौँ :   कोभिड-१९ संक्रमितको सम्पर्कमा आएका सबैलाई  पीसीआर परीक्षण गराउन काठमाडौँ महानगरपालिकाले आग्रह गरेको छ। बुधबार महानगरको ६० औँ कार्यपालिकाको बैठकले  स्वास्थ्यमा जटिल समस्या आइपरे स्वास्थ्यकर्मीसँग सम्पर्क गर्न पनि नागरिकलाई अनुरोध गरेको छ ।

संक्रमितलाई होम आइसोलेशनमा बस्‍न र अरुलाई संक्रमण सार्न नदिन चनाखो हुनुपर्ने महानगरपालिका स्वास्थ्य विभागका प्रमुख हरि कुँवरले बताए । भिडभाड नगर्न र जनस्वास्थ्यको मापदण्ड पालना गर्नुपर्ने उनको भनाइ छ ।

---

कुँवरले निषेधाज्ञाको पूर्णरूपमा पालना गर्न पनि आग्रह गरेका छन् । कोभिड-१९ रोकथाम तथा नियन्त्रणका लागि सचेतना कार्यक्रम गर्न महानगरबासीलाई आग्रह गर्ने निर्णय भएको उनले जानकारी दिए ।