धरानका मेयर साम्पाङको वडाध्यक्ष र कार्यपालिका सदस्यलाई राजीनामा दिन निर्देशन

काठमाडौँ- धरान उपमहानगरपालिकाका मेयर हर्क साम्पाङले कार्यपालिका बैठक बहिष्कार गर्ने वडा अध्यक्ष र कार्यपालिका सदस्यलाई राजीनामा दिन निर्देशन दिएका छन् । बिहीबार विज्ञप्ति जारी गरी उनले कर्तव्य पूरा नगरेका र काम गर्न असक्षम भएको घोषणा गर्दै राजीनामा दिनुपर्ने धारणा राखेका हुन् ।

‘कार्यपालिका बैठक बहिष्कार गर्ने जति सबैले नैतिकताको आधारमा राजीनामा दिएर बाटो प्रशस्त बनाइ आम धरानवासी जनता र लोकतन्त्रलाई सहयोग गर्न अनुरोध गर्दछु,’ उनले भनेका छन् ।

---

कार्यपालिकामा रहने सबैका लागि बैठकमा बस्नुपर्ने कर्तव्य रहेको मेयर साम्पाङले स्मरण गराएका छन् । कसैको अधिकार, रहर या चाहनाको कुरा नभइ बाध्यकारी नीति भएको उनले प्रस्ट पारेका छन् । ‘कसैले म बैठक बस्दिन भन्न पाइदैन,’ उनले अगाडि थपे,’ यो बाध्यकारी कर्तव्य रहेको बोध गराउन चाहन्छु ।‘

कार्यपालिकाको बैठकमा नगर अध्यक्षको बैठकको अवज्ञा गर्नु विधिको उल्लघंन गरिरहेको बताए । बैठकमा के एजेण्डामा बोल्ने कसले कति समयसम्म बोल्ने त्यसको समय निर्धारण अध्यक्ष गर्ने पनि उनले बताए।

‘कार्यविधिको दफाको उपदफा ३ र ४ मा दिइएको अधिकार प्रयोग गरि धेरै नबोल्नु समय सकियो भन्दा ‘बोल्छु के गर्छस’ भन्दै उफ्रने सदस्यलाई स्पष्टीकरण माग्नुपर्ने देखिन्छ,’ उनले विज्ञप्तिमा भनेका छन्,’ ‘देश र जनताको सेवा गर्छु । आफ्नो कर्तव्य पूरा गर्छु । कुनै पार्टी, जाती, धर्म, वर्ग र क्षेत्रभन्दा उठेर काम गर्छु ।‘ भनी खाएको सपथ बिर्सेर पार्टीको व्हीपलाई जनताको हितभन्दा ठूलो मान्ने र जनताको विकासका कामहरू गर्न गराउन निर्णय गर्नुपर्ने महत्त्वपूर्ण बैठकलाई बहिष्कार गर्नेहरू प्रति खेद प्रकट गर्दछु ।‘  

त्यसैगरी, आफ्नो वडामा भएको प्रगति विवरण पेश गर्न वडा अध्यक्षलाई निर्देशन दिएका छन् । संविधानको धारा २७ मा उल्लेखित सूचना पाउने नागरिकको मौलिक हक दिन नमानेकाले वडामा के-कस्ता काम भए त्यसको विवरण सार्वजनिक गर्न निर्देशन दिएका हुन् ।

उनले अध्यक्षलाई लक्षित गरी वडामा के कस्ता योजना तथा कार्यहरू सम्पन्न भए त्यसको विवरण माग्दा कुनै असहमति राख्‍नुपर्ने कारण नभएको प्रस्ट पारेका छन् ।