काम गरेको ज्याला नपाएपछि पुल बन्द

खलङ्गा - पुल निर्माणमा काम गरेको ज्याला नपाएपछि स्थानीय मजदुरले झोलुङ्गे पुल बन्द गरेका छन् । दुई वर्ष अगाडि निर्माण भएको दार्चुलाको दुहूँ गाउँपालिका वडा नम्बर १ र ५ जोड्ने झोलुङ्गे पुलमा काम गरेका स्थानीयवासीले काम गरेको ज्याला नपाएपछि पुल बन्द गरेका हुन् ।

गाउँपालिकाको रु दुई करोड १० लाख लागत रहेको तीन सय ९० मिटर लम्बाइ भएको उक्त पुलको २०७६ सालमा निर्माण सुरु भएको थियो । दुई वर्षभित्र पुल निर्माण गर्नुपर्ने समयसीमा रहेको पुलमा अहिले पनि लोड टेस्टलगायतका काम बाँकी रहेकाले अन्तिम किस्ता भुक्तानी हुन बाँकी रहेको गाउँपालिका–१ का वडाध्यक्ष जितबहादुर बमले बताए ।  पुलमा केही संरचनाको प्राविधिक परीक्षणमा त्रुटिसमेत भेटिएको र पुलको छेउतिरको एक लठ्ठासमेत खुस्किएको अध्यक्ष बमले बताए । 

---

पुल निर्माणको भौतिक काम सम्पन्न भएको दुई वर्ष समय हुँदासमेत ठेकेदार कम्पनीले श्रमिकहरूको ज्याला भुक्तानी नगरेको भन्दै स्थानीय श्रमिकहरूले शुक्रबारदेखि पुल बन्द गरेको गाउँपालिका अध्यक्ष नरेन्द्र बडालले बताए ।  पटकपटक काम गरेको ज्यालाका लागि आग्रह गर्दा पनि ज्याला नपाएपछि पुल नै बन्द गर्नुपरेको श्रमिक मजदुरको भनाइ छ । 

झोलुङ्गे पुलको दुवै तिर तारजाली र जस्तापाता लगाएर बार लगाइएको छ । पुल बन्द भएपछि जिल्ला सदरमुकाम खलङ्गा आउने र काम विशेषले गाउँपालिकाको कार्यालयसम्म जाने नागरिकलाई दुई घण्टा लामो बाटो भएर जानुपर्ने अवस्था सिर्जना भएको स्थानीय नवीन जोशीले गुनासो गरे । 

निर्माणको जिम्मेवारी पाएको जगदम्बा दोभान कन्सट्रक्सनले श्रमिकहरूको ज्याला अझैसम्म नदिनुका कारण भने खुलेको छैन । निर्माण कम्पनीको अन्तिम चरणको भुक्तानीसमेत लिन बाँकी रहेको गाउँपालिकाका प्रमुख प्रशासकीय अधिकृत नरबहादुर ठगुन्नाले बताए । 

गाउँपालिकाको वडा नम्बर १, २ र ५ का स्थानीयवासीले उक्त पुल निर्माणको समयमा मजदुरी गरेका थिए । निर्माण सम्पन्न भइसकेको अवस्थामा मजदुरको ज्याला नदिई ठेकेदार कम्पनी सम्पर्कविहीन भएको स्थानीय पसलधनी नरेन्द्र जोशीले बताए । 

यसअघि पनि स्थानीयवासीले पटकपटक आफूहरूले काम गरेको ज्याला पाउनुपर्ने भनी गाउँपालिका कार्यालय र जिल्ला प्रशासन कार्यालयमा आग्रह गर्दा पनि सुनुवाइ नभएको भन्दै स्थानीय मजदुर आक्रोशित भएका छन् ।  

निर्माण कम्पनीले मजदुरसँगै पसलधनी र ट्र्याक्टर व्यवसायीहरूको समेत पैसा दिएको  छैन । स्थानीय श्रमिकहरू पसलधनी र ट्र्याक्टर व्यवसायीहरूले बेलाबेला गाउँपालिकाको न्यायिक समिति र जिल्ला प्रशासन कार्यालय दार्चुलामा अनुरोध गर्दा पनि कुनै निकास नआएपछि पुल बन्द गर्न बाध्य भएको  पसलधनी नरेन्द्र जोशीले बताए । 

'हामीले पटकपटक गाउँपालिका र प्रशासनलाई काम गरेको ज्याला दिलाइदिन आग्रह गर्‍यौँ, गाउँपालिकाले  आश्वासन मात्रै दियो, हामीले काम गरेको ज्याला त पाउनु पर्‍यो, ज्याला मजदुरी गरेर परिवार पाल्ने हाम्रो समस्या कसले बुझ्छ ?', श्रमिक राजेन्द्र जोशीले भने । 

गाउँपालिकाले  पटकपटक ठेकेदार कम्पनीसँग सम्पर्क गर्न खोज्दा ठेकेदार कम्पनी सम्पर्कमा नआएको गाउँपालिकाका निवर्तमान अध्यक्ष पुलेन्द्रबहादुर कार्कीले बताए । 'पहिलेदेखि नै हामीले ठेकेदार कम्पनीसँग सम्पर्क गर्न खोजेका हौँ, उहाँहरू सम्पर्कमा आउनुभएन', उनले भने । 

पीडितहरूले जिल्ला प्रशासन कार्यालयमा लिखित निवेदन दिएको र ठेकेदार कम्पनीलाई सम्पर्कमा ल्याउने प्रयास भइरहेको जिल्ला प्रशासन कार्यालय दार्चुलाका प्रमुख जिल्ला अधिकारी किरण जोशीले बताए । 

श्रमिकहरूले श्रम गरेबापतको रकम पाउनुपर्ने र स्थानीय श्रमिकहरूले पनि सार्वजनिक पुल बन्द गर्न नहुने उनको भनाइ छ । 'ठेकेदारलाई गाउँपालिका र प्रशासनले सम्पर्क गर्न खोजे पनि सम्पर्क भएको छैन', उनले भने । पुल निर्माण भइसकेको भए पनि निर्माण कम्पनीले गाउँपालिकालाई हस्तान्तरणसमेत नगरेको गाउँपालिकाका प्रवक्ता देवबहादुर बमले जानकारी दिए । 

'पुल गाउँपालिकालाई हस्तान्तरणसमेत भएको छैन, पुल सञ्चालनको अनुमति नै छैन, त्यहाँ आवतजावत नगर्न हामीले पनि आग्रह गरेका छौँ, पुलको लोड टेस्टसमेत नभएको रहेछ', प्रजिअ जोशीले भने । उनले पुल प्रयोग गर्दा कुनै अप्रिय घटना भए राज्य जिम्मेवार नहुने बताए । रासस