स्विट्जरल्यान्ड पठाइदिन्छु भन्दै ठगी गर्ने महिला पक्राउ

काठमाडौँ- स्विट्जरल्यान्ड पठाइदिन्छु भन्दै रकम ठगी गर्ने एक महिलालाई प्रहरीले पक्राउ गरेको छ । काभ्रेपलाञ्चोक बनेपा नगरपालिका-४ घर भई हाल बाँके कोहलपुर नगरपालिका-११ दशबिगा बस्ने ४६ वर्षीया पार्वती थापालाई पक्राउ गरिएको हो ।

उनलाई वैदेशिक रोजगारीका लागि स्विट्जरल्यान्ड पठाइदिन्छु भन्दै रकम ठगी गरेको अभियोगमा सोमबार दिउँसो प्रहरीले पक्राउ गरेको छ ।

---

उनले पीडितलाई वैदेशिक रोजगारका लागि स्विट्जरल्यान्ड पठाई सुपरमार्केटमा प्याकिङको काम लगाइदिन्छु र मासिक एक लाख रुपैयाँ तलब हुन्छ भन्दै प्रलोभनमा पारी पीडितबाट पटकपटक गरी ७ लाख २० हजार रुपैयाँ रकम ठगी गरेकाले पक्राउ गरी उपस्थित गराउन वैदेशिक रोजगार विभागबाट पत्राचार भएपछि काठमाडौँ उपत्यका अपराध अनुसन्धान कार्यालय मिनभवनबाट खटिएको प्रहरीले उनलाई काठमाडौँ महानगरपालिका २६ गोंगबुबाट पक्राउ गरेको हो ।

थप अनुसन्धान तथा कारबाहीका लागि उनलाई वैदेशिक रोजगार विभाग बुद्धनगर काठमाडौँ पठाइएको प्रहरीले जनाएको छ ।