मकवानपुरमा दुई क्विन्टल गाँजासहित १२ जना नियन्त्रणमा

मकवानपुर- मकवानपुर प्रहरीले झण्डै २ क्विन्टल गाँजासहित १२ जनालाई नियन्त्रणमा लिएकाे छ । मकवानपुरको हेटौंडाको रातोमाटेबाट​ जिल्ला प्रहरी कार्यालय मकवानपुरले लागूऔषध गाँजासहित १२ जनालाई नियन्त्रणमा लिएकाे हो ।

प्रहरीले १४४ किलो लागूऔषध गाँजासहित ६ जना र अरु ४७ किलो गाँजासहित ६ जनालाई नियन्त्रणमा लिएको हो । हेटौंडा उपमहानगरपालिका वडा नम्बर–१५ रातोमाटेबाट छुट्टाछुट्टै सवारी साधनबाट गरी उक्त परिमाणको गाँजासहित त्यसमा संलग्नलाई नियन्त्रणमा लिएको जिल्ला प्रहरी कार्यालय मकवानपुरका प्रहरी नायव उपरीक्षक टेकबहादुर कार्कीले जानकारी दिए ।

---

चितवनबाट वीरगंजतर्फ जाँदै गरेको बागमती प्रदेश–०१–०२५ च ३३८४ नम्बरको कार र प्र २–०३–००७ प ४७५४ नम्बरको मोटरसाइकललाई शंका लागि सुरक्षाजाँच गर्दा रातोमाटे चेकपोष्टमा ४७ किलो लागूऔषध गाँजा फेला परेको मकवानपुर प्रहरीले जानकारी दिएको छ ।

पक्राउ पर्नेमा कारमा सवार पर्सा जिल्ला वीरगंज महानगरपालिका–१४ का ४२ वर्षीय कन्हैयालाल महतो, २६ वर्षीय बिनोद मण्डल, वीरगंज–१८ का २० वर्षीया दुसमेना खातुन र २१ वर्षीया पुजाकुमारी मण्डल र मोटरसाइकलमा सवार पर्सा जिल्लाको पटेरवा सुगौली गाउँपालिका–४ का २५ वर्षीय विनय चौधरी र पर्सा जिल्लाको वीरगंज महानगरपालिका–१४ का ३९ वर्षीय बिनोद पासवान रहेको प्रहरीले जानकारी दिएको छ ।

त्यस्तै, डीएल १ जीसी ३०३५ नम्वरको ईण्डियन ट्रक चालक देश भारतको मोतिहारी जिल्ला गोबिन्द बारा बस्ने ६५ वर्षीय लालबहादुर सहनी, डीएल १२ सीए ०५७८ नम्बरको स्कारपियोमा सवार पर्साको वीरगंज महानगरपालिका–१३ बस्ने २५ वर्षीय सन्तोस गुप्ता, बाराको बिश्रामपुर गाउँपालिका वडा नम्वर–४ बस्ने २४ वर्षीय सुरज साह, २१ वर्षीय गौतमकुमार साह, पर्साको छिपहरमाई गाउँपालिका–३ बस्ने ३१ वर्षीय मोहमद नवसाद हुसेन र २८ वर्षीय रमेश यादवलाई पक्राउ गरेको प्रहरी नायव उपरीक्षक कार्कीले बताए ।