लागूऔषध कारोबार गर्ने चार युवा पक्राउ

सुर्खेत- जिल्ला प्रहरी कार्यालय सुर्खेतले सोमबार वीरेन्द्रनगरबाट चार जना लागूऔषध कारोबार गर्ने युवाहरूलाई नियन्त्रणमा लिएको छ ।

लागूऔषध कारोबार भइरहेको गोप्य सूचनाका आधारमा प्रहरीले छापा हान्ने क्रममा उनीहरूलाई पक्राउ गरेको छ । उनीहरूको साथबाट २८० मिलिग्राम लागूऔषध ब्राउन सुगर रहेको प्रहरीले जनाएको छ ।

---

प्रहरीले वीरेन्द्रनगर नगरपालिका–५ बस्ने २२ वर्षीय राजन केसी, २६ वर्षीय अमर विक र ३२ वर्षीय ढकेन्द्र विकलाई नियन्त्रणमा लिएको छ ।

यस्तै वीरेन्द्रनगर नगरपालिका–३ मुलपानी चोकको एक होटलबाट पनि एक जना लागूऔषध कारोबारी पक्राउ परेका छन् । पक्राउ पर्नेमा २६ वर्षीय बलबहादुर भारती रहेका छन् । उनको साथबाट पनि ४ पुडिया लागूऔषध बरामद गरिएको प्रहरीले जनाएको छ । पक्राउ परेका चारैजना माथि आवश्यक अनुसन्धान भइरहेको प्रहरीले जनाएको छ ।