धनगढी उपमहानगरले गर्‍याे बजार क्षेत्रमा जडित सिसिटिभी क्यामरा मर्मत

कैलाली- धनगढीमा बिग्रिएका सबै सिसिटिभी क्यामरा मर्मत गरिएको छ । धनगढी उपमहानगरपालिकाले आफ्नै खर्चमा बजार क्षेत्रमा जडान गरिएका सिसी क्यामरा मर्मत गरेको हो । 

धनगढी उपमहानगरपालिकाका नगर प्रमुख गोपाल हमालको निजी सचिवालयका अनुसार बोराडाँडीदेखि त्रिनगर भन्सारसम्मका १२ वटा, ट्राफिक चौराहदेखि जिल्ला प्रहरी कार्यालयसम्मका १८ वटा र जिल्ला प्रहरी कार्यालय परिसरमा रहेका पाँच वटा सिसी क्यामरा मर्मत गरिएको हो । 

---

उक्त क्यामेरा मर्मतका लागि उपमहानगरपालिकाले दुई लाख ७१ हजार पाँच सय ४४ रुपैयाँ खर्च गरेको छ। धनगढीमा सिसिटिभी क्यामरा बिग्रिएकाले आपराधिक कृयाकलाप तथा दुर्घटना हुँदा अनुसन्धानमा समस्या हुने गरेको थियो । 

जिल्ला प्रहरी कार्यालय, कैलालीले मर्मतका लागि अनुरोध गरेकोमा उपमहानगरपालिकाले मर्मत गरेको हो । धनगढीको मुख्य बजार क्षेत्रमा २४ घण्टा क्यामरा सञ्चालनमा रहने छन् ।