बिहानैदेखि अवरुद्ध भीमदत्त राजमार्गमा गएकाे पहिराे हटाइँदै

कैलाली- सुदूरपश्चिमका सात पहाडी जिल्लालाई तराईसँग जोड्ने भीमदत्त राजमार्ग अन्तर्गत कैलालीको गोदावरी नगरपालिका र चुरे गाउँपालिकामा विभिन्न स्थानमा गएको पहिरो खोल्ने क्रम तीव्र पारिएको छ ।

सडक विभाग र सुरक्षाकर्मीहरूले बिहानैदेखि अवरोध हटाउन लागेका हुन् । यद्यपि सडक भासिएका कारण तत्काल यातायात सुचारु हुने सम्भावना भने देखिँदैन । पहिरो आउने क्रम जारी रहेका कारण अवरोध हटाउने कठिनाइ भइरहेको छ ।

---

जिल्ला प्रहरी कार्यालय कैलालीका प्रवक्ता तथा प्रहरी नायव उपरीक्षक कुलदीप चन्दले पहिरो हटाएर यातायात सुचारु गर्ने कार्य तीव्र पारिए पनि सडक नै भासिएका कारण तत्काल यातायात सुचारु गर्न कठिनाइ भएको बताए ।

कैलालीको बुढीतोला, खानीडाँडामा सडक भासिनुका साथै विभिन्न ठाउँमा गएको पहिरोका कारण भीमदत्त राजमार्ग आज बिहानदेखि पूर्ण रूपमा अवरुद्ध भएको थियो ।