सुदूरपश्चिम सरकारले गर्‍याे भीमदत्त राजमार्गमा गएको पहिरोको अवलोकन

कैलाली- सुदूरपश्चिमका सात पहाडी जिल्लालाई तराईसँग जोड्ने भीमदत्त राजमार्ग अन्तर्गत कैलालीको गोदावरी नगरपालिका र चुरे गाउँपालिकामा विभिन्न स्थानमा गएको पहिरो खोल्ने कार्यको सुदूरपश्चिम प्रदेश सरकारले अवलोकन गरेको छ । 

प्रदेशका मुख्यमन्त्री कमलबहादुर शाह, आन्तरिक मामिला तथा कानुनमन्त्री शिबराज भट्ट लगायतका मन्त्री र सुरक्षा निकायको टोलीले पहिरो क्षेत्रको अवलोकन गरेका हुन् । 

---

पहिरो क्षेत्रको अवलोकन गर्दै मुख्यमन्त्री शाहले छिटोभन्दा छिटो सडक सुचारु गर्न सबैले सहयोग गर्न आग्रह गरे । 

मुख्यमन्त्री लगायतको टोली फर्किए लगतै उक्त क्षेत्रमा भीषण वर्षा भइरहेको हेभी उक्युप्मेन्ट डिभिजन गोदावरीका लक्ष्मण ऎरले बताए । उनले करिब ५० मिटर सडक क्लियर गरि सकेकोको अवस्थामा वर्षाका कारण काम अवरुद्ध भएको बताउँदै भोलि बिहानदेखि पुनः सडक खोल्ने काम थालिने बताए । 

यद्यपि सडक भासिएका कारण तत्काल यातायात सुचारु हुने सम्भावना छैन । पहिरो आउने क्रम जारी रहेका कारण अवरोध हटाउने कठिनाइ भइरहेको छ ।

कैलालीको बुढीतोला, खानीडाँडामा सडक भासिनुका साथै विभिन्न ठाउँमा गएको पहिरोका कारण भीमदत्त राजमार्ग आज बिहानदेखि पूर्ण रूपमा अवरुद्ध भएको छ ।