सम्मानका लागि अधिकारकर्मी भएकाे होइन : सरस्वती नेपाली

काठमाडौँ–  अधिकारकर्मी सरस्वती नेपालीले आफूले सम्मान तथा आदर पाउने भनेर अधिकारकर्मी नभएको बताएकी छिन् । बिहीबार राष्ट्रिय दलित पत्रकार समूहद्वारा आयोजित बधाई तथा सम्मान कार्यक्रममा बोल्दै उनले त्यस्तो बताएकी हुन् । 

---

अमेरिकी डिपार्टमेन्ट अफ स्टेटको ग्लोबल एन्टि–रेसिजम च्याम्पियन अवार्ड – २०२३ द्वारा सम्मानित अधिकारकर्मी नेपालीलाई बिहीबार अनामनगरस्थित शिक्षा पत्रकार समूहको सभाहलमा सम्मान गरिएको छ । 

कार्यक्रममा बोल्दै अधिकारकर्मी नेपालीले आफ्ना जीवनमा आइपरेका अनेक कुराको स्मरण गर्दै भावुक बनेकी थिइन् । 

शिक्षा पत्रकार समूहका अध्यक्ष कृष्ण मल्लले शुभकामना मन्तव्य दिँदै निरन्तर आफ्नो कर्ममा लाग्दा कतै न कतैबाट मूल्यांकन हुने बताए । उनले भने, ‘ सरस्वतीजीले आफ्नो काममा निरन्तर लागेर नै यो अवार्ड प्राप्त गर्नुभएको छ ।’

कार्यक्रममा राष्ट्रिय दलित पत्रकार समूह, पत्रकार महासंघ, शिक्षा पत्रकार समूह एवम् सरोकारवालाहरूको उपस्थिति रहेको थियो ।