सामूहिक दुर्घटना बीमाबाट कर्णालीवासीले पाए साढे तीन करोड बढी रकम

सुर्खेत- प्राकृतिक प्रकोपका विभिन्न घटनामा परि मृत्यु भएका कर्णालीका एक सय ८१ जनाका परिवारले सामूहिक जोखिम दुर्घटना बीमाबाट साढे तीन करोड रकम प्राप्त गरेका छन् ।

पछिल्लो तीन वर्षको अवधिमा विभिन्न प्राकृतिक प्रकोपका घटनामा परि मृत्यु भएका परिवारले कर्णाली सरकारले गरिदिएको सामूहिक जोखिम दुर्घटना बीमाबाट साढे तीन करोड बढी रकम प्राप्त गरेका हुन् । उनीहरूले ३ करोड ६२ लाख रकम पाएका हुन् ।

---

आन्तरिक मामिला तथा कानुन मन्त्रालयका अनुसार प्रकोपबाट मृत्यु भएका प्रतिपरिवारलाई दुई लाखका दरले रकम उपलब्ध गराइएको छ ।

कर्णाली प्रदेश सरकारले २०७६ सालमा प्रदेशका सबै नागरिकको सामूहिक दुर्घटना जोखिम बीमा गरिदिएको थियो । कर्णाली प्रदेशका कुनै पनि नागरिकको प्रकोप या प्राकृतिक विपदबाट निम्तिने दुर्घटनाले मृत्यु भएमा २ लाख रुपैयाँ पाउने र उक्त रकम राष्ट्रिय बीमा कम्पनीले उपलब्ध गराउने गरेको आन्तरिक मामिला मन्त्रालयका विपद् व्यवस्थापन शाखा प्रमुख कृष्णबहादुर रोकायले बताए ।

उनका अनुसार आर्थिक वर्ष २०७७/०७८ मा विभिन्न प्राकृतिक प्रकोपमा परि मृत्यु भएका ५९ जनाका परिवारले बीमा रकम पाएका छन् भने आर्थिक वर्ष २०७८/०७९ मा ५८ जनाका परिवारले बीमा रकम पाएका छन् । त्यसैगरी आर्थिक वर्ष २०७९/०८० मा ६४ जनाले सामूहिक दुर्घटना बीमाबाट रकम दिइएको रोकायले जानकारी दिए ।

राष्ट्रिय बीमा कम्पनीसँग सम्झौताअनुसार कर्णालीका करिब १७ लाख जनसंख्याको सामूहिक बीमा सरकारले गरिदिएको छ । एक व्यक्ति बराबर ९ रुपैयाँ पर्ने गरी सरकारले नै नागरिकको बीमा गरिदिएको छ ।